Bonos díes, bona xente.
Alborecemos col cielu cubiertu ya con unes temperatures que tan alrodiu de los 12ºC.
Güei vamos tener el cielu mui nuboso con precipitaciones pela tarde, sobre too al final cuando puen ser moderaes y persistentes con unes temperatures másimes en descensu ya col aire que sedrá de componente norte sele en xeneral.
Mañana xueves dirán remitiendo los xarabatos al aborecer anque’l día va caltenese nuboso con unes temperatures que subirán llixeramente ya col aire que sedrá sele ya variable.
El vienres alboreceremos ente’l borrín y la nublina, dixebrándose a lu llargu la mañana pa dexanos un día soleyeru y perguapu, sicasí l’aire nordés pue ser cafiante nel llitoral y zones espuestes, baxando la sensación térmica. Ellí onde tenemos abellugaos d’él l’ascensu de les temperatures másimes sedrá moderáu.
El sábadu vamos tener el cielu poco nuboso o con dalgo de nubosidá alta y yá con temperatures primaverales. Y el domingu va tar poco nuboso con un bultable ascensu de les temperatures anque paez que mos va durar poco, la selmana viniente un embolsamientu d’aire fríu n’altor, xunto a la entrada de vientu de componente norte pue dexanos precipitaciones fuertes ya persistentes con un descensu de les temperatures pero esto yá lu diremos viendo.
Que paséis un bon miércoles collacies ya collacios.
Semeya que mos l’apurre’l nuesu collaciu Pachu Armesto Hevia.
This work is licensed under a Creative Commons Attribution 4.0 International License.
