Bonos díes, bona xente.
Alborecemos col cielu nuboso ya con unes temperatures que tan alrodiu de los 11ºC, rexistrándose nel puirtu Payares 2,2ºC.
Güei vamos tener una mañana seliquina con nubes ya claros o abancios pa dir desendolcándose la nubosidá a partir del mediudía y dexanos dalgúl xarabatu pela tarde con unes temperatures que suben llixeramente o camudarán poco ya col aire del norte-nordés sele en xeneral anque nel llitoral y zones espuestes pue dexanos raches moderaes.
Mañana miércoles tendremos más nubosidá y el día sedrá más escuru, sobre too pela tarde cuando van xeneralizase les precipitaciones que puen ser persistentes ya moderaes al fianr el día con unes temperatures másimes en descensu ya col aire que sedrá sele de componente norte-noroeste.
Durante’l riscar del xueves van seguir los xarabatos moderaos pero a partir del alborecer van tender a remitir y desaparecer. L’ambiente sedrá humedu y frescu y les temperatures camudarán poco.
El vienres meyorará y l’aire nordés llimpiará’l cielu pa dexanos una tardiquina soleyera y prestosa, sicasí na costa pue ser cafiante y baxar la sensación térmica pero ellí onde temos abellugáu d’él subirán les temperatures nidiamente.
El sábadu y domingu predominarán los claros o abancios sobre les nubes y l’ambiente sedrá primaveral con un ascensu bultable de les temperatures.
Que paséis un bon martes collacies ya collacios.
Semeya que mos l’apurre la nuesa collacia Consuelo Vázquez.
This work is licensed under a Creative Commons Attribution 4.0 International License.
