Sindicatos y plataformes sociales desixen que se audite la imparcialidá de dellos de los participantes nel Comité d’Investigación
El comité creáu para analizar l’accidente de Zarréu y les sos conexones con El Musel ta formáu por representantes del Principáu d’Asturies, qu’inclúin técnicos de Mines, Mediu Ambiente y Transición Xusta; miembros del Parlamentu Asturianu, con representación de tolos grupos políticos (PSOE, PP, Podemos, Foro) y espertos independientes, ye dicir Inxenieros de mines, xuristes y sindicatos mayoritarios (CCOO, SOMA-UGT).
Delles organizaciones sociales denunciaron yá la esistencia d’incompatibilidaes y barruntu d’imparcialidá por posibles conflictos d’interés énte los miembros propuestos pa formar parte d’esti comité: la Plataforma contra la Impunidá Minera acusa al comité d’incluyir a “técnicos que respondieron por permisos irregulares”. La páxina Desfalko Públicu, basándose na información apaecida na prensa asturiana en relación al casu,  apunta en concretu a trés posibles conflictos d’intereses con nome propiu.
Señálense dos figures con antecedentes cuestionables: en primer llugar Belarmina Díaz (Esconseyera d’Industria y Minería), quien dirixó’l Serviciu de Mines d’Asturies ente los años 2020 y 2023 y foi conseyera hasta abril de 2025. Ella foi quien autorizó los permisos a Blue Solving en 2022-2023, magar denuncies vecinales. Arrenunció tres l’accidente, pero sigue asesorando al gobiernu asturianu en transición enerxética.
José Ramón García (PP, Parlamentu Asturianu) que la so relación con Victorino Alonso ye conocida. Alonso ye ex dueñu de mines na zona y foi condergáu por delitos ambientales, pero caltien influencia nel sector. García recibió financiamientu de campaña en 2019 d’empreses venceyaes a Alonso.

Per otra parte, les suspicacies apunten tamién a Jesús Manuel Rodríguez Morán (pa del dueñu de BlueSolving) que nun ta nel comité, pero que la so rede empresarial inclúi a Antonio Blanco (esdirectivu del Musel), agora na Autoridá Portuaria de Xixón, que podría influyir na investigación.

Por tou ello, de nun tomase les midies afayaices separtando a les persones con sospeches de conflictu d’intereses, la investigación sobre’l casu nun podría considerase fiable. 

Llucía F. Marqués