El próximu 9 de mayu, a les 19 h y nel Teatru Campoamor, celébrase’l 46 Día de les Lletres Asturianes. Con esti actu, de llibre accesu, ponse’l ramu a una selmana d’actividaes, alcordances y cultura de les lletres de nueso
L’actu istitucional col que s’acueyen a los nuevos académicos de l’Academia la Llingua Asturiana va entamar cola interpretación d’una tonada al cargu de la cantadora Lorena Corripio y el gaiteru Vicente Prado «El Pravianu».
Na ceremonia va dase acoyida a los nuevos académicos, de los que dos son numberarios, los investigadores y profesores Ruth González Rodríguez y Alberto Fernández Costales, y una correspondiente, la profesora y escritora Paquita Suarez Coalla.
Ruth González ye profesora nel Istitutu Galileo Galilei de Navia, de Lengua Castellana y Literatura. Ye tamién profesora del cursu de capacitación docente d’eo-naviego. Ye filóloga, especializada en llinguística xeneral y pertenez a la comisión que ta ellaborando el diccionariu normativu d’eonaviego. Collabora en revistes como Lliteratura y participa nes actividaes del colectivu Agayo Eonaviego.
Alberto Fernández Costales ye caderalgu de Didáutica de la Llingua y la Lliteratura na Universidá d’Uviéu. La so investigación y la so docencia céntrense na educación billingüe y na formación didáutica pal profesoráu de llingües en Primaria y Secundaria. Nello emplega especial atención a la dimensión afeutiva, la revitalización de les llingües minoritaries, la metodoloxía nel aula y l’usu de la teunoloxía como sofitu pedagóxicu. La so producción científica inclúi más de 60 artículos en revistes internacionales y 80 capítulos de llibru n’editoriales de prestixu. Ye miembru de dellos comités científicos y asesor del Centru d’Estudios sobre l’Impautu Social de la Intelixencia Artificial (CEISIA) y la Cátedra Concepción Arenal de l’Axenda 2030. Dende 2019, ye académicu correspondiente de l’ALLA, collaborando na última década na Universidá Asturiana de Branu, na revisión de trabayos científicos y n’otres actividaes y xeres de la institución.
Finalmente Paquita Suarez Coalla ye filóloga y doctora pola Universidá d’Uviéu, ye profesora de llingua y lliteratura na Universidá de la Ciudá de Nueva York. Consiguió l’atención del panorama lliterariu asturianu cola so obra “La mio vida ye una novela”, una coleición de testimonios de les muyeres del campu asturianu. Nestes dos últimes décades publicó otres obres narratives de creación propia, como “Pa nun escaeceme” o “El día que nos llevaron al cine y otros cuentos” . Nel ámbitu infantil y xuvenil, han destacase los llibros “Paecen esguiles” o “Camín de lletres: d’Asturies a Nueva York”, col que ganó’l premiu María Josefa Canellada. Amás de collaborar davezu cola revista Lliteratura, como resultáu del so trabayu investigador y docente, vien participando en delles de les actividaes de l’Academia de la Llingua Asturiana: como docente na Universidá Asturiana de Branu, como ponente y conferenciante nes Xornaes Internacionales d’Estudiu o como autora de diferentes estudios na revista científica “Lletres Asturianes”.
Los tres aceutarán los sos nomamientos na xunta estraordinaria d’académicos pública que tradicionalmente s’alluga dientro del actu.
Tres de les intervenciones de los académicos y del presidente de l’ALLA, actuará la banda de gaites de Navia La Reina del Truébano.
Susana Sela
This work is licensed under a Creative Commons Attribution 4.0 International License.
