Cada salmón capturáu ye un reproductor menos nos ríos asturianos. Y cada semeya sorriente col Campanu recién pescáu acaba convirtiéndose nuna imaxe incómoda: la d’una sociedá que diz defender y celebrar el so patrimoniu natural mientres contribúi activamente a la so desaparición. Tamién retrata una alministración incapaz de poner la conservación perriba de los intereses económicos, les presiones sectoriales y una visión folclórica de la tradición que sigue pesando más que cualquier criteriu ecolóxicu o científicu.

Salmón atlánticu

El salmón atlánticu ta viviendo nos ríos asturianos una situación terminal que científicos, investigadores y colectivos ambientales lleven años denunciando ensin que’l Principáu tea dispuestu a tomar midíes. Cada temporada qu’abre la pesca hai menos salmones remontando los ríos y les cifres oficiales yá nun dexen sitiu pa les escuses: falamos d’un colapsu ecolóxicu en marcha frente al que l’Alministración sigue actuando con una pasividá que raya na irresponsabilidá.

Un mes tuvo que pasar esti añu pa qu’apaeciera’l tan esperáu Campanu. Un mes y un día, pa ser exactos. Como una conderga. Una conderga a muerte. Nel 2021 pescárense 23 salmones nesi mesmu periodu y yá entós aquello foi considerao una llaceria histórica y una llamada d’atención desesperada sobre la necesidá d’actuar con urxencia. La respuesta institucional foi la mesma de siempre: mirar pa otru llau.

Spoiler: nun se fixo res.

La situación nun fixo más qu’apiorar. Les estadístiques oficiales espeyen añu tres añu una cayida brutal na población salmonera asturiana. En 2007 controlárense oficialmente 1.599 salmones nos ríos del país; en 2025 la cifra baxó hasta namái 130 exemplares. Falamos d’una perda superior al 90 % en menos de dos décades.

Da lo mesmo. El salmón sigue pescándose. Captúrase aproximao’l 25 % de los salmones adultos que consiguen volver a los ríos y fáese precisamente cuando remonten les corrientes pa reproducise. Ye dicir: mátase a los exemplares qu’entá podríen garantizar la supervivencia de la especie. Pa munchos científicos y conservacionistes esto nun ye yá una contradicción difícil d’esplicar; ye directamente una política de desaniciu por omisión. El biólogu David Álvarez resumiólo ensin adornos: “nun se debería pescar nengún salmón” porque facelo “ye condergalu a la estinción”.

Y sí, les causes del declive son múltiples. El cambéu climáticu eleva la temperatura de les agües y altera los ciclos migratorios; les preses y centrales hidroeléctriques convierten los ríos n’auténtiques trampes; la contaminación y la destrucción del hábitat dificulten la reproducción. Pero sumar a tou ello una presión pesquera constante ye escribir la crónica d’un desaniciu anunciau.

Falamos d’una especie emblemática, parte fundamental del patrimoniu natural, cultural y simbólicu d’Asturies, que lleva décades en retrocesu continuu. A pesar d’ello, el Principáu sigue autorizando la so pesca.

Esta política entra amás en contradicción direuta coles obligaciones derivaes de la Directiva 92/43/CEE, la llamada Directiva Hábitats, qu’obliga a garantizar un estáu de conservación favorable de les especies y de los ecosistemes que les sostienen. Permitir la pesca recreativa d’una especie en declive estructural nun ye xestión sostenible: ye negar la evidencia científica y forciar al máximu los llendes de la normativa europea.

El mensaxe políticu que se tresmite ye demoledor. La protección del mediu natural queda subordinada a intereses económicos, a presiones sectoriales y a una idea folclórica de la tradición que paez tar perriba de cualquier criteriu ecolóxicu. N’otros territorios europeos, énte escenarios asemeyaos, optóse por moratories totales y restricciones severes. Equí prefier siguir celebrándose’l Campanu como si nada pasare.

La noticia de la captura del Campanu del Sella ye, poro, una noticia fondamente murnia. Un espeyu de cómo, escudándose en “tradiciones” y intereses económicos, puede empuxase una especie escontra’l precipiciu.

El caberu Campanu vendióse por 11.400 euros; l’anterior llegara a algamar los 19.300. Cantidaes que, más allá del titular llamativu, abren una pregunta incómoda: ¿cuántu val realmente’l caberu salmón d’Asturies?