Los 18 trabayadores que queden na plantilla de la mina Miura lleven dende abril del 25 ensin cobrar, pero tampocu reciben el despidu que yos permitiría optar al paru

Cinco trabayadores de la mina Miura, na parroquia de Tormaleo, remanecen empresllaos nel interior de la esplotación dende esti xueves como midida de protesta polos impagos salariales que carecen dende hai meses. La situación ye llaceriosa, lleven un añu enteru ensin cobrar les sos nómines, pero tampocu tienen reconocíu’l despidu, polo que nun pueden acceder con normalidá a les prestaciones por desemplegu.

Los impagos remóntense a abril de 2025, cuando la mina entá pertenecía a Jesús Manuel Rodríguez Morán, conocíu como Chus Mirantes. N’ochobre d’esi añu la esplotación pasó a manes de Fernando Martínez Blanco, al traviés de la empresa BIG TNZ TRADING SL, qu’asumió la titularidá de Carbones La Vega, sociedá venceyada a la mina. Los trabayadores señalen que’l nuevu propietariu comprometióse a asumir la delda pendiente y regularizar la situación, pero esos compromisos nun se materializaron.

La empresa pagó namái dalguna mensualidá aislada, ente elles la correspondiente a payares, ensin resolver el gruesu de les nómines atrasaes. Metanes d’esa incertidume celebróse hai pocos díes un xuiciu venceyáu al conflictu llaboral, nel que se volvió treslladar la intención de pagar parte de la delda de manera inmediata. Tampocu se cumplió.

La plantilla actual quedó amenorgada a 18 persones, bien llueñe de los cerca de 40 emplegaos qu’hubo n’otros tiempos. Parte d’esa reducción esplicaríase pola imposibilidá de siguir aguantando meses ensin cobrar. Dellos trabayadores abandonaron los sos puestos ensin recibir les cantidaes adeudaes y atopándose, amás, con dificultaes pa cobrar el paru al nun resolvese la relación contractual cola empresa.

Según esplicó José María Pérez Pereira, representante de los trabayadores, l’empresariu comprometióse a pagar dos nómines esti martes y a plantegar una reestructuración de la delda que permitiera retomar l’actividá y saldar los pagos nun plazu d’unos 120 díes. Sicasí, esi compromisu volvió incumplise y la empresa dio nueves escuses, prometiendo otra vegada pagar la selmana próxima.

Los mineros aseguren tar “esgotaos” tres meses de promeses incumplíes. Defenden que la so intención nunca foi otra qu’asegurar el futuru del so puestu de trabayu. Nun reclamen xubíes salariales nin midíes estraordinaries: piden cobrar lo que se-yos debe o, como mínimu, que se regularice la so situación pa poder tener accesu al desemplegu.

L’Ayuntamientu d’Ibias espresó públicamente’l so sofitu a los mineros y calificó la situación d’“inxusta ya insostenible”. El consistoriu reclamó una solución urxente a los responsables del conflictu y pidió tamién prudencia a los trabayadores empresllaos, al tratase d’unes instalaciones que lleven un añu ensin actividá.

El conflictu de Miura amuesa una realidá especialmente dura: trabayadores ensin salariu, ensin despidu y ensin drechu efectivu a una salida. Mientres la empresa sigue ensin dar respuesta definitiva, cinco mineros tan baxo tierra reclamando lo más básico: cobrar polo trabayao o poder entamar de nuevu, y anuncien que nun saldrán d’all

This work is licensed under a Creative Commons Attribution 4.0 International License.