Anantes de na pido esculpies; soi consciente que les mios pallabres queden curties pa espeyar tou esi dolor, tola raxón que mos come per dientro, tolos dies, toles hores, a toles muyeres. 

Porque non tolos homes, pero si a toles muyeres.

Supónse que nel Día de la Muyer Trabayadora tendría qu’escribir daqué contundente, intelixente, afilao, que removiera conciencies o que mos ficiera sentir más cómodes cola nuesa llucha.
Daqué como que nes caberes décades –menos d’un sieglu– pasemos de ser propiedá de pas y maríos a ser independientes, tener trabayos, tener coses tan rares como coche, votu o cuenta corriente. Drechos, lleis que mos amparen, lliberación sexual, voz.

O daqué más reivindicativo: recordar lo que mos falta, que seguimos siendo menospreciaes, relegaes, abusaes, acosaes, asesinaes, con una impunidá tala que nin los homes que dicen –convencíos– defendemos tienen claro lo que vivimos. Podría falar de la fienda salarial, del repartu de los curiaos, xeres y responsabilidaes, de les desixencies estétiques d’una moda que nos quier siempres nos venti años, de tantes coses.

Pero nun voi facelo. Non porque nun quiera, sinon porque me sobrepasa la realidá y nun alcuentro pallabres.

Vereis: allá pelos noventa creíemos que la igualdá yera imparable, que los drechos de les muyeres, como los de la clas obrera, nun diben perdese más nunca; que toos y toes teníemos nidio lo que yera feminismu, igualdá, drechos… Nun sé, igual ye que yera yo mui moza ya inocente. Creíemos nun futuru meyor pa homes y muyeres. Yera’l tiempu de frases mítiques: el fíu del obreru a la universidá, bable nes escueles, el mio cuerpu, la mio decisión. Tiempu d’esperanza.

Trenta años.

Nun ye que nun avancemos: reculemos. Veo a les collacies de los mios fios, venti años recién cumplíos, “decidiendo” que nun van falar con homes porque la so pareya nun quier; tomando de continuo la píldora del día dempués porque ellos “nun esfruten con condón”; reconociendo qu’aceuten práutiques sexuales que nun yos gusten “pa satisfacelu y que nun me dexe”. Rapacines de 14 y 15 años con “rutines de belleza diaria” esaustives, maquillaes como puertes “pero que nun se note”, mirando en bucle vídeos de tiktokers filtraes que les guíen nel camín de la sagrada belleza imposible, naguando por tener los 15 y que yos paguen, como regalu de fin d’ESO, una operación de tetes.

Veo rapacinos repitiendo conseñes que paecíen medievales va mediu sieglu: la violencia machista nun esiste; si la violaron será que lo taba buscando; a nosotros tamién nos maten. Tan normalizaes, por exemplu, les pelees y palices porque un mozu salga cola ex d’otru; porque, yá sabes, si fuiste, yes suya pa siempres. Los homes tienen drechu, al paecer, a etiquetate y que naide más te toque. Nel institutu d’al par de mio casa toparonlos creando imáxenes con IA de les compañeres desnudes y pasándose semeyes de les sos pareyes en porriques. Micro, macro y megamachismos, defendíos tantu por ellos como por elles, nun escenariu delirante.

Elles, les mesmes que tienen miéu a volver soles pa casa o a dir al bañu. Porque sí, van a perseguiles, acorralales, aterrorizales. Lo de que los paisanos entren pola fuercia al bañu de les muyeres, tanto en chiringuitos como n’istitutos, pa mí ye nuevo: enteréme va pocu.

Ente los adultos la cosa nun ta muncho meyor. Tantes coses que me queden fuera del papel.
Na base de tou ello, una ignorancia absoluta, descomanada ya intencionada. Tracamundiar feminismu con “superioridá de la muyer” nun ye casual nin inocente. Terxiversar estadístiques y datos nun ye ensin querer. Los argumentos más cuñaos tan basaos en declaraciones dirixíes espardíes sibilina o direutamente.

¿Les redes? ¿Pa qué falar d’elles? Un paseu polos mensaxes de pura misoxinia que se topen estos díes nelles ye abondo pa estrozar l’estómadu.

Pero toi dando vueltes a lo evidente porque me cuesta falar de lo que me revuelve. Nun topo pallabres que recueyan lo que siento. La impunidá, la indefensión, la conciencia de que son sieglos nos que les élites sobrepasen toles llendes, yá non del respetu o del drechu, sinon de la humanidá mesma; la manera sistemática na que se ignora a les víctimes y, sobre too, la indiferencia.

Porque abusos –del poderosu contra’l pueblu y d’homes contra muyeres, d’homes poderosos contra muyeres del pueblu, sobremanera– hebiolos siempres. Pero que fueren tan notorios, públicos, espardíos ya ensin consecuencies como agora… nunca.

This work is licensed under a Creative Commons Attribution 4.0 International License.