La propuesta de privatizar el serviciu municipal d’agües en Sieru por un periodu de trenta años abre un procesu que va más allá d’una simple modificación del modelu de xestión. Trátase d’una decisión de llargu alcance que condicionaría la política municipal y la vida de los vecinos durante décades, afeutando a un recursu esencial pa la vida diaria de la población

L’agua ye un bien común y un drechu fundamental reconocíu, polo que la responsabilidá de garantizar el so suministru correspuende a les alministraciones públiques. Dende esta perspectiva, la xestión municipal nun tien namás un componente técnicu, sinón tamién social: asegurar l’accesu universal al serviciu con independencia de la situación económica de cada usuariu.

La concesión prevista a una empresa privada d’esi bien supondría la entrega del serviciu a una empresa privada en réxime de monopoliu durante trenta años. Una duración tan prolongada implica una perda efectiva del control públicu sobre la xestión, les inversiones y les polítiques tarifaries. Nun se trata d’una decisión reversible a curtiu o mediu plazu, y nin siquiera un eventual cambiu de gobiernu municipal tendría capacidá real pa modificar les condiciones d’una concesión d’esti tipu.

Un de los aspectos que más esmolecimientu xenera ye’l modelu de precios. Na xestión pública, les tases tán llendaes pol coste del serviciu y nun pueden superar esi importe. Nel casu de la xestión privada, la lloxística camuda: la empresa concesionaria opera baxo criterios de rentabilidá económica, lo que supón la eliminación del preciu másimu y la posibilidá de xubíes tarifaries desvenceyaes del coste real. Diversos estudios indiquen que la xestión privada del serviciu d’agües resulta, de media, un 22% más cara pa la ciudadanía.

La xustificación de la privatización apóyase, en parte, nel estáu actual del serviciu, marcáu por carencies estructurales y necesidaes d’inversión. Sicasí, los datos disponibles apunten a que estos problemes deriven fundamentalmente de la falta d’inversión pública. De la inversión prevista pal serviciu d’agües en Sieru, namái s’executó’l 32%, una cifra qu’asoleya una política de desatención progresiva. Nesti contestu, la privatización preséntase como solución a un problema que, en gran midida, foi xeneráu pola propia falta d’apuesta pola xestión pública.

Esa cuestión plantega tamién cuestiones de calter llegal. La llei de contratos públicos desixe que la privatización d’un serviciu tea debidamente xustificada, demostrando la imposibilidá o ineficacia de la xestión directa. Nel casu de Sieru, l’Ayuntamientu dispón d’un ampliu marxe de recursos propios, polo que resulta discutible que s’esistan razones obxetives que faigan necesaria la entrega del serviciu a una empresa privada.

Nel ámbitu social, la propuesta nun pasó desapercibida. Una parte de la población vien reclamando que la decisión se someta a una consulta ciudadana, dada la importancia del serviciu y la duración de la concesión prevista. Esta demanda pon sobre la mesa la necesidá d’abrir un debate públicu fondu sobre’l modelu de xestión de los servicios esenciales y sobre’l papel que tien de xugar l’Alministración local.

La privatización del serviciu d’agües en Sieru nun ye, polo tanto, una cuestión puramente técnica nin presupuestaria. Ye una decisión estructural que afecta al control públicu d’un bien común, a les condiciones d’accesu al serviciu y a la capacidá futura del conceyu pa definir les sos polítiques.

This work is licensed under a Creative Commons Attribution 4.0 International License.