L’aprobación por parte del Gobiernu del Principáu del proyeutu de Costco en Siero como Proyectu de Interés Estratéxicu Rexoonal (PIER) nun ye solo una decisión urbanística discutible: ye, sobro too, una demostración de debilidá política del Executivu d’Adrián Barbón, qu’acabó plegándose a les presiones del alcalde de Siero pa sacar alantre un proyeutu que nun encaxa na normativa vixente.

Dende’l primer momentu, el proyuctu chocaba frontalmente col planeamientu urbanísticu y comercial. El polígonu de Bobes ye suelu industrial, y la normativa autonómica y de conceyu nun permite grandes superficies comerciales d’esti tipu. Costco nun podía instalase ellí pela vía ordinaria. La solución foi clara: declarar el proyeutu como PIER y usar esa figura escepcional como un tragaderu llegal que pasa penriba de les normes que valen pa tol restu.

El papel del alcalde de Siero foi determinante. Non solo defendió públicamente la implantación “a cualesquier preciu”, sinón que llegó a amenazar políticamente con impulsar una candidatura propia si Barbón nun desbloqueaba’l proyeutu. Esa presión abierta, conocida y publicada, acabó teniendo efeutu. El Gobiernu de Barbón cedió, y con elli, el presidente Barbón, que prefirió evitar un conflictu internu enantes que sostener la coherencia normativa y territorial.

Pero si la cesión del PSOE ye grave, la posición d’Izquierda Unida resulta especialmente contradictoria. IU votó en contra del PIER concretu de Costco, pero aprobó previamente la figura del PIER como instrumentu xurídicu, sabiendo perfechamente que ye una ferramienta diseñada pa saltase planeamientos urbanísticos cuando interesa políticamente. Agora IU protesta pol usu… d’una llei qu’ella mesma contribuyó a consolidar. Una oposición retórica, pero ensin asunción de responsabilidaes, que dexa n’evidencia una falta de coherencia difícil d’esplicar ante quien ve cómo se desarma la planificación territorial en nome de la “estratexa”.

Mientres tanto, los comerciantes de Siero vienen siendo los grandes perxudicaos del procesu. Dende asociaciones y negocios de proximidá denuncióse que la implantación d’una gran superficie como Costco va provocar un impautu directu y negativu sobro’l comerciu llocal, nun conceyu yá saturáu de grandes equipamientos comerciales. Nun se trata d’un debate ideolóxicu, sinón d’un problema económicu real: menos ventes, menos rotación, menos supervivencia pa negocios que sostienen emplegu estable y vida urbana diaria.

Los comerciantes tamién punxeron l’acentu nun asuntu clave: la falta tresparencia. Alegaciones presentaes ensin respuesta clara, espedientes difíciles d’acceder y una sensación xeneralizada de que la decisión taba tomada dende’l primer momentu. El PIER, que debía ser una figura escepcional y xustificada, acabó convirtiéndose nun mecanismu pa validar lo que, pol camín ordinariu, nun se podría aprobar.

El casu de Costco en Siero marca un precedente peligrosu. Si una multinacional pue saltase les normes urbanístiques con apoyu políticu y presión municipal, ¿qué valor tienen entós los planes xenerales, les directrices comerciales y la planificación territorial? ¿Pa quién son obligatories y pa quién non?

La operación Costco nun ye solo un problema comercial. Ye un síntoma d’un modelu de gobiernu onde les normes valen hasta qu’estorben, onde la presión política gana a la planificación y onde quien más pierde ye’l texíu económicu llocal. Barbón cedió. IU tragó. Y los comerciantes de Siero, otra vuelta, paguen.

This work is licensed under a Creative Commons Attribution 4.0 International License.