La polémica alredor del monumentu a los ‘Héroes del Simanques’ en Xixón vuelve ocupar el centru del debate públicu. Mientres PP y Vox salieron a defender ensin matices la permanencia d’esti símbolu franquista, el PSOE de Xixón anunció agora la so disposición a aplicar la Llei de Memoria Democrática y valorar la retirada, alineándose —al menos nel discursu— coles posiciones memorialistes.
El monumentu, erixíu en 1958 en plena dictadura y dedicáu a militares golpistes de 1936, ye tal como denuncien coleutivos como FAMYR, Asturies Laica o Andecha Astur un elementu d’esaltación fascista incompatible con un espaciu públicu democráticu. Estes organizaciones lleven años reclamando la so retirada ensin respuesta efeutiva de les instituciones.
La reacción dende la derecha foi inmediata. Vox defendió la continuidá del monumentu apelando a la so protección urbanística y al “respetu a la historia”, llegando inclusive a amenazar con reposicionalu si se retira. El PP de Xixón sumóse a esi argumentariu, acusando a la izquierda de querer reescribir el pasáu por motivos ideolóxicos.
El cambéu de tonu del PSOE llega, sicasí, dempués de décades d’inacción. PSOE y IU gobernaron n’Asturies y en Xixón durante munchos años, ensin atender les demandes reiterades de retirada de símbolos franquistes presentaes dende la izquierda nacionaliega y los coleutivos memorialistes. La so incorporación actual al llau de la memoria democrática abre interrogantes sobro la credibilidá d’un xiru que llega cuando la presión social y política yá ye evidente.
El casu del Simanques vuelve amosar una realidá incómoda: una derecha que normaliza la simboloxía franquista y una izquierda institucional que reacciona tarde, frente a la izquierda nacioanliega y un movimientu memorialista que lleva años sosteniendo la reivindicación dende fuera de les instituciones. La resolución d’esti conflictu va ser una prueba clara del compromisu real cola memoria democrática n’Asturies.
This work is licensed under a Creative Commons Attribution 4.0 International License.
