La celebración con mazcaritos del Domingu’l Gordu en Rozaes foi reactivada hai diez años, tres más de trenta ensin facese, y dende entós la organización foi afinando la puesta en escena: dende la ellaboración artesanal de mazcares y adornos con materiales del entornu rural hasta la implicación de los más nuevos nel ritual y el so significáu.

Los mazcaritos nun pueden enseñar la cara

Les mazcaraes d’iviernu son manifestaciones rituales d’orixe mui antiguu que se caltienen n’Asturies, venceyaes al ciclu del iviernu, entamando nes feches coincidentes coles folixes navidiegues (solsticiu d’iviernu) y destacando especialmente nos díes d’Antroxu. Trátase de celebraciones populares nes que persones amazcaraes percorren pueblos y cases, faciendo ruíu, provocando, pidiendo alimentos o interactuando cola vecindá, nuna mestura de folixa, ritu y transgresión social.

Anque güei los ritos antroxiegos s’asocien al calendariu cristianu —xeneralmente a los díes previos a la Cuaresma—, el so orixe ye precristianu. Los investigadores rellacionen estes práctiques con antiguos rituales agrarios de fin d’iviernu, destinaos a espantar los malos espíritus, protexer la comunidá y favorecer la fertilidá de la tierra y del ganáu. Exemplos d’estes mazcaraes son los Sidros de Valdesoto, la Guirria de Ponga, los Zamarrones de L.lena o los más conocíos y cellebraos, los mazcaritos d’Uviéu.

Una d’estes mazcaraes, recuperada hai diez años polos propios vecinos, ye la celebración del Domingu’l Gordu en Rozaes, onde les llueques tornaron sonar peles cais al pasu de los mazcaraos, tocaos col clásicu picorniu de llana y fueya de maíz. Un rasgu común a toles mazcaraes d’iviernu ye la transgresión de les normes y la inversión del orde social. L’anonimatu ye clave: por eso les cares tapaes y los elementos que desfiguren la silueta. En munches tradiciones, como pasa colos mazcaraos maliayos, namái pueden amosar la cara si hai convite, y descubrir la cara ensin permisu rompe’l xuegu ritual. La ruta, casa por casa, estiéndese polos pueblos de Rozaes, Llugás y Poreñu, onde van pidiendo comida y sidre, xuntando la folixa col ritual.

Nesti Domingu’l Gordu participaron más d’una trentena de vecinos, con abonda reciella, nun percorríu polos distintos barrios de la parroquia —en San Pedrín, Fabares, Morvís, Triás, Sanzornín, Villanueva y Piñera— colos elementos tradicionales: caretes, cencerros, palos, picornios y ropa antiguo.

Como manda la costume, la vecindá correspuende col convite: dulces del Antroxu como fayueles y picatostes, amás de tortielles y, por supuestu, sidre, nun ambiente de convivencia que venceya fiesta, identidá y memoria colectiva.

This work is licensed under a Creative Commons Attribution 4.0 International License.