El ‘Principado’ dio un pasu importante al denegar, per fin, la autorización ambiental de dos parques eólicos proyectaos nel occidente asturianu: Gamotal y Pereiro.
L’impactu visual de los eólicos ye impactante
La decisión, espublizada nel BOPA, concrétase nuna Declaración d’Impactu Ambiental desfavorable emitida pola Conseyería de Movilidá, Mediu Ambiente y Xestión d’Emerxencies, depués d’evaluar los graves efectos que los proyectos podríen causar nel territoriu.
Dende la Coordinadora Ecoloxista d’Asturies y dende los propios vecinos de les zones afectaes, venía advirtiendose dende va tiempu que, nin siquiera aplicando midíes preventives, correutores o compensatories, podía descartase un impactu negativu significativu. Los informes recueyen afecciones direutes sobre la población, los tremendos daños sobre la fauna aviar, un fuerte impactu visual nel paisaxe y daños sobre bienes del patrimoniu natural y cultural, especialmente graves al tar munchos núcleos habitados a menos de 1.000 metros de los aeroxeneradores.
El parque eólicu de Gamotal contemplaba la instalación de seis aeroxeneradores de 5 MW, con afección directa a los conceyos de Boal, Illano y Villayón, y a núcleos como Bullaso, Villar de Bullaso, El Couz, Castanedo, Barandón o Fuentes Cabadas. Pela so parte, el parque de Pereiro proyectaba trés aeroxeneradores de la mesma potencia, afectando a Vegadeo y Taramundi, y a una llarga llista de pueblos: Fabal, A Lamisqueira, Cereixido, Fuente de Louteiro, Las Tingas, Ouria, Abres, Bustelo d’Abres, Refoxos, A Graña, O Vale, Folgueiral y Tremeado.
Estos casos nun son episodios aisllaos. N’Asturies furrulen anguaño 24 complexos eólicos o polígonos industriales d’enerxía eólica, con 698 MW de potencia instalada y 525 aeroxeneradores, toos ellos concentraos nel occidente asturianu. Amás, tán en tramitación más de 49 nuevos proyectos, que sumen más de 415 aeroxeneradores y superen los 1.154 MW de potencia prevista, lo que supondría un incrementu notable del impactu ambiental, paisaxísticu y social nuna mesma área xeográfica.
Hai que recordar que’l desarrollu de los parques eólicos n’Asturies vien arrastrando dende va décades múltiples irregularidaes, dalgunes inda ensin resolver. Una de les más importantes ye l’ausencia d’una Evaluación Ambiental Estratéxica (EAE) pa’l conxuntu de los parques, tal como esixen la Directiva 2001/41/CE y la Llei 9/2006, de 28 d’abril, sobre la evaluación de los efectos de determinaos planes y programes nel mediu ambiente. L’analís fragmentáu de los proyectos, unu a unu, impide valorar el verdaderu impactu acumulativu que sufren el territoriu y les sos xentes.
Dende la Coordinadora Ecoloxista recuerden, amás, que siguen ensin resolvese munches de les denuncies presentaes nestes últimes décades por daños ambientales, urbanísticos y al patrimoniu históricu. La denegación de Gamotal y Pereiro supón un aliviu pa les comunidaes afectaes, pero tamién un avisu claru: la transición enerxética nun pue facese a costa del paisaxe, del patrimoniu y de la calidá de vida de la población rural asturiana.
This work is licensed under a Creative Commons Attribution 4.0 International License.
