Les tiendes de campaña instalaes nos terrenos del plan de víes de Xixón fueron retiraes esti miércoles nun operativu coordináu ente la Policía Nacional, la Policía Llocal y los servicios de llimpieza municipal. L’actuación tuvo como oxetivu oficial facilitar una llimpieza a fondu de la finca, pero dexó a decenes de persones albentestate

Pa poder llevar a cabu les xeres de llimpieza, procedióse al desagospiu de les persones ensin llar que pernoctaben nesi espaciu, onde calteníen delles pertenencies personales baxo cobixos precarios, como tiendes y estructures improvisaes con plásticos. El desagospiu realizóse ensin incidencies, y los enseres retiraos que nun pudieron ser recuperaos nel momentu van quedar custodiaos mientres diez díes nes dependencies policiales, depués de lo que van ser tiraos a la basoria.

Dende l’Ayuntamientu xustificóse la intervención pola necesidá de garantizar la seguridá nes xeres de llimpieza y pola situación de salubridad del recintu, una zona colindante col Solarón que depende d’ADIF y que carez d’avezu retrasos nes xeres de desbroce y caltenimientu. 

Sicasí, esta actuación vuelve poner enriba la mesa una realidá que se repite: les persones ensin llar son desagospiaes d’espacios onde sobreviven ensin que se-yos ufierte una alternativa habitacional estable. Estes intervenciones, que yá se produxeron n’otres ocasiones nel mesmu entornu, nun resuelven el problema de fondu, y les acampaes improvisaes vuelven apaecer col pasu’l tiempu.

La situación del ensinllarismu n’Asturies vien agravándose nos caberos años. Les dificultaes pa cuantificar el fenómenu faen que les cifres disponibles seyan aproximaes, pero los datos actuales indiquen que pente mil y dos mil persones viven ensin un llugar onde residir. Cada nuechi, una media de 973 persones agospiénse en recursos asistenciales, un 13 % más qu’en 2022, a lo que hai qu’amestar cerca de cien persones diaries atendíes direutamente na cai. Organizaciones como Cáritas eleven la cifra hasta más de 1.600 solicitúes d’ayuda por falta de techu.

Esta realidá podría ser entá más fonda si se tienen en cuenta les persones que refuguen ayuda institucional o que sobreviven n’infraviviendes, soluciones temporales o habitáculos precarios que nun entren nos recuentos oficiales.

En Xixón, onde l’añu pasáu se produxeron dos fallecimientos de persones ensin llar, les estimaciones más recientes falen d’unes 290 persones n’esta situación. D’elles, 76 duermen direutamente na cai, principalmente na zona del Plan de víes y debaxo la ponte al par de la estación. Munchos acaben de quedar ensin llugar ya ensin les sos escases pertenencies. 

La combinación de falta de vivienda asequible, la precariedá llaboral y una atención insuficiente a la salú mental ta na base d’esta crisis social. Un problema estructural que nun s’igua col desagospiu d’espacios, y que dpolítiques públiques estables, recursos suficientes y soluciones habitacionales dignes, tomando midíes que vaigan más allá de la simple retirada de tiendes y pertenencies.

This work is licensed under a Creative Commons Attribution 4.0 International License.