Finalmente, y pesi a tolos intentos de subterfuxu llegal pa evitalo —dende l’allargamientu del procedimientu al intentu de declaralu Bien d’Interés Cultural—, va ser retiráu’l monumentu a los denomaos “Héroes del Simancas” de la fachada’l colexu de La Inmaculada, en Xixón. La decisión supón un pasu decisivu na eliminación d’un símbolu d’exaltación franquista del espaciu públicu y una victoria del movimientu memorialista asturianu dempués d’años de revindicación.
Finalmente va baltase’l monumentu franquista.
El ‘Principado’ dio lluz verde al entamu del procesu de retirada, desixendo a los Xesuites la so ‘retirada o eliminación’ nun plazu de tres meses, al considerar que’l monumentu incumple la normativa vixente en materia de memoria democrática.
Coles mesmes, quedó presllada definitivamente la vía de la so proteición patrimonial, tres el refugu oficial a la so declaración como BIC, una maniobra que pretendía blindar la escultura y frenar la so eliminación. Esa tentativa foi interpretada poles asociaciones memorialistes como un intentu de caltener nel tiempu un homenaxe públicu a los defensores del golpe militar de 1936.
La retirada llega dempués d’un percorríu alministrativu marcáu polos retrasos y pola caducidá d’un procedimientu anterior, que provocó una fonda indignación social. Sicasí, la reapertura del expediente y la decisión actual confirmen que la caducidá nun suponía un abandonu del procesu, sinón un retrasu ‘forciáu por causes alministratives’. Agora, col nuevu procedimientu activu, l’Alministración autonómica queda habilitada pa esixir la retirada del monumentu y, de ser necesario, executala de manera subsidiaria.
El monumentu, erixíu en plena dictadura franquista, foi dende’l so entamu un elementu de glorificación de la sublevación militar y de los sos protagonistes, ensin nenguna contextualización crítica nin respetu a les víctimes de la represión. La so presencia nun llugar visible y d’usu públicu constituyía una anomalía democrática que pervivió demasiaos años, convirtiéndose tamién nun puntu de concentración de simbología franquista en distintes ocasiones.
Dende les organizaciones de memoria histórica, la decisión foi recibida como una reparación simbólica necesaria y como una muestra de que la presión social y la perseverancia acaben dando resultaos. Señalen que la retirada del monumentu nun ye un actu d’esborriáu de la historia, sinón una manera de dexar de rendir homenaxe institucional al fascismu y d’afitar un espaciu públicu acorde colos valores democráticos.
La eliminación del monumentu a los “Héroes del Simancas” marca asina un fin de etapa n’Asturies y abre la puerta a una xestión del pasáu más xusta y respetuosa. Dempués de décades de silenciu y d’intentos de perpetuar símbolos de la dictadura baxo argumentos patrimoniales o burocráticos, el procesu llega al so desenllaz: el monumentu va ser retiráu. Falta saber cuando.
Nel Dos Santos
This work is licensed under a Creative Commons Attribution 4.0 International License.
