Fernando Alonso encara la so temporada númberu 23 nuna Fórmula 1 dafechu renovada. Aston Martin, con un monoplaza nuevu, motor Honda y el fichaxe de Adrian Newey, aspira a dar un saltu definitivu. El proyectu ta en marcha y el pilotu asturianu ya’l direutor técnicu británicu son les pieces clave sobre les que se sostién esta nueva etapa.

Nesta temporada, el Nano va siguir siendo una figura fundamental na Fórmula 1. Tres 22 campañes na categoría, el natural d’Uviéu afronta la so temporada númberu 23 con Aston Martin, lo que lu convierte nel pilotu con más temporaes na historia del campionatu. Per detrás ta Kimi Räikkönen, con dos temporaes menos que’l pilotu asturianu.

Aston Martin, pela so parte, ta nun momentu decisivu, con un monoplaza nuevu diseñáu pa la revolución técnica que s’estrena esti añu y con dos cambeos clave. Per un llau, el pasu de montar motores Mercedes a convertise n’equipu oficial Honda, lo que marca un saltu estructural y d’ambición; y, per otru, el fichaxe d’Adrian Newey como direutor técnicu, una incorporación que debería elevar de manera notable’l nivel aerodinámicu del coche.

La temporada 2026 trai consigo un cambéu total na normativa técnica. El reglamentu introduce motores híbridos nuevos, eliminando componentes tradicionales como la unidá de recuperación de calor (MGU-H), ente que la parte eléctrica aumenta de forma significativa hasta aportar alredor del 50 % de la potencia total. Los coches van utilizar per primer vegada combustibles 100 % sostenibles y el pesu mínimu redúcese hasta los 768 quilos, frente a los 798 del reglamentu anterior, lo que da llugar a monoplaces más axiles y eficientes.

El nuevu Aston Martin AMR26 ta concebíu dende cero pa estes normes. La integración con Honda ye completa: motor, tresmisión y chasis desenvuélvense de manera conxunta, ente que l’equipu británicu asume la xestión del paquete aerodinámicu, la electrónica y la puesta a puntu. Honda regresa como fabricante oficial tres el so éxitu con Red Bull, col que consiguió seis títulos mundiales ente 2019 y 2023, de la mano de Max Verstappen y del propiu Adrian Newey, agora incorporáu al equipu de Silverstone. Tamién va ser clave la aerodinámica activa, con alerones delantiru y traseru regulables en carrera pa meyorar el rendimientu y facilitar los adelantamientos, sustituyendo al DRS tradicional, lo que fai entá más relevante la llegada d’unu de los mayores talentos de la historia de la categoría.

Esti nuevu escenariu supón un retu pa tolos equipos, pero tamién una oportunidá pa Aston Martin y Alonso. El cambéu de reglamentu tiende a igualar el terrén, pero la rapidez a la d’adaptase va ser decisiva pa lluchar por podios y victories. Anque Newey demostró n’ocasiones anteriores la so capacidá pa interpretar normes nueves —como en 2009 con Brawn GP o en 2017 con Red Bull—, Honda tamién amosó nel pasáu que necesita tiempu pa algamar motores plenamente competitivos, como quedó patente nos primeros años de la era híbrida.

Fernando Alonso nun ye solo’l pilotu del AMR26, sinón una pieza esencial nel so desenvolvimientu. A lo llargo de la so carrera vivió cuatro grandes revoluciones reglamentaries: 2005, 2009, 2014 y agora 2026. La so capacidá pa aportar información técnica detallada ye clave pa acelerar la evolución del coche, y dende’l so regresu a la Fórmula 1 con Aston Martin en 2023 convirtióse nel líder del equipu dientro y fuera de la pista. Con 44 años, ye’l pilotu con más temporaes na historia de la categoría y unu de los más respeutaos nel paddock. El so palmarés inclúi 32 victories, 106 podios, 22 poles, dos campeonatos del mundu y trés subcampeonatos, y, a pesar de la edá, sigue compitiendo a un nivel mui altu, a menudo per riba de pilotos muncho más nuevos.

Anque la retirada ye una posibilidá que siempres ta presente, Alonso caltién intacta la motivación y cree que esti nuevu reglamentu pue ser una oportunidá pa volver destacar. El so contratu con Aston Martin remata al final de la temporada 2026, y va ser entós cuando se sepa si decide poner fin a la so trayeutoria na categoría o siguir un añu más nel paddock.

Dende’l puntu de vista del aficionáu, la cautela convive cola ilusión. Na Fórmula 1 nada ta garantizáu. Fernando Alonso afronta la temporada con un motor Honda nuevu, un compañeru d’equipu muncho más mozu y una estructura deportiva y técnica fondamente renovada. A lo llargo de la so carrera pasó por Minardi, Renault, McLaren, Ferrari y Alpine, demostrando siempres la so calidá y resiliencia. Y Fernando sigue equí, una temporada más.

Pasaron yá casi trece años dende la so última victoria, nel Gran Premiu d’España de 2013, y más de cuatro dende’l so últimu podiu, nel Gran Premiu de Qatar de 2022. Compartió garaxe con un total de 17 compañeros d’equipu, ente ellos nomes destacaos como Giancarlo Fisichella, Lewis Hamilton, Kimi Räikkönen, Felipe Massa o Jenson Button. Y Fernando sigue equí.

Con 22 poles, 32 victories, 106 podios, dos campeonatos del mundu, trés subcampeonatos y más de 380 Grandes Premios disputaos, pasó por tolos niveles de la categoría: dende los sos entamos en Minardi hasta los títulos con Renault, etapes brillantes en McLaren y Ferrari, y años más difíciles en Alpine y de nuevu en McLaren. Protagonizó xestes memorables, como la so remontada nel Mundial de 2005, la victoria nel Gran Premiu d’Europa de 2012 en Valencia saliendo dende la undécima posición, salíes magistrales como les del Gran Premiu d’España de 2011 o Hungría 2006, o la so espectacular salida en Indianápolis en 2004. Amás, consiguió grandes ésitos fuera de la Fórmula 1, como les sos dos victories nes 24 Hores de Le Mans y el títulu del Campeonatu Mundial de Resistencia.

Tres superar decepciones como les 500 milles d’Indianápolis, los años escuros de McLaren-Honda o campeonatos escapaos por detalles mínimos, y dempués de rivalidaes con nomes como Schumacher, Hamilton o Vettel, quién sabe si’l futuru-y tien preparada una nueva frente a Verstappen, Lando Norris o cualesquier otra estrella moza. En 23 años de trayeutoria, Fernando Alonso convirtióse nuna pieza fundamental de la historia del deporte y nuna figura clave na vida de millones de persones. Mientres munchos de los que lu siguen casáronse, tuvieron fíos, nacieron o morrieron, acabaron estudios, montaron negocios o pasaron pol amor y el desengañu, el Nano sigue equí.

Y mientres siga asina, namái queda una entruga nel aire:
Oye, Fernando, ¿y si volvemos a suañar?

This work is licensed under a Creative Commons Attribution 4.0 International License.