La fuelga ferroviaria entama esti llunes con paros convocaos pa los díes 9, 10 y 11 de febreru, afeutando a los servicios ferroviarios tanto nos trenes de Cercaníes como nos de Media Distancia, dientro d’un marcu xeneral de reducciones y cancelaciones
Les cercaníes van ser les más afeutaes polos paros
La convocatoria de fuelga foi acordada por delles organizaciones sindicales del sector ferroviariu tres fracasar les negociaciones col Ministeriu de Tresportes. Dende los sindicatos esplicase que la protesta vien motivada pola so preocupación pola seguridá na rede ferroviaria y poles condiciones de trabayu del personal, amás de reclamar una mayor inversión en caltenimientu, el refuerzu de les plantilles y la meyora de los protocolos de prevención y seguridá.
N’Asturies, la fuelga concrétase nuna menor frecuencia de trenes y na supresión de dellos servicios, especialmente fora de les hores punta, por mor de l’aplicación de los, pa dalgunos escesivos, servicios mínimos determinaos a nivel estatal, que tamién s’apliquen nos servicios que conecten les principales llocalidaes del país y nos enllaces ferroviarios con otres comunidaes. Les empreses ferroviaries recomienden a les persones usuaries que consulten con antelación l’estáu de los sos traxectos.
La circulación ferroviaria y la xestión de la infraestructura tán condicionaes polos paros, anque se caltienen los servicios consideraos esenciales. Hasta agora, dende’l Gobiernu d’Asturies nun se fixo nenguna valoración específica sobre la fuelga, distanciándose del conflictu y llavándose les manes comu faen d’avezu al aporfiar en que “trátase d’una convocatoria d’ámbitu estatal y la comunidá atiense a los mesmos criterios de servicios mínimos que’l restu del territoriu”.
La fuelga ta prevista hasta’l miércoles 11 de febreru, ensin que se produxeren, polo momento, avances que faigan prever la so desconvocatoria. La situación ta afectando a la movilidá diaria de miles de persones n’Asturies, nun contestu nel que les posiciones ente los sindicatos y l’Alministración estatal siguen ensin averase.
Nel casu d’Asturies, el Ministeriu de Tresportes incluyó de manera espresa dellos trenes de llarga distancia dientro de los servicios mínimos, polo que van circular a lo llargo de los trés díes de fuelga. Estes circulaciones garantíen la conexón direuta del país con Madrid, Valencia y Alicante, anque dende l’Alministración estatal adviértese de que pueden producise axustes horarios o modificaciones n’otros servicios que nun figuren nesta relación.
Nel ámbitu de la Media Distancia, los servicios van caltener una media del 65 % de les circulaciones habituales, col compromisu de que haya polo menos un tren por sentíu y día en cada llinia. N’Asturies, esta situación afeuta especialmente a corredores como los enllaces con Valladolid, Llión y Santander. Anque la reducción de frecuencies va ser notable, el Ministeriu destaca que se preserven los desplazamientos consideraos inaplazables en territorios onde les alternatives por carretera son llendaes o insuficientes.
El mayor impactu pa les persones usuaries va producise nos servicios de Cercaníes, emplegaos de manera diaria por miles de viaxeros. Nes hores punta va circular el 75 % del serviciu habitual, ente que fora d’esos tramos la ufierta va baxar al 50 %. Estes midíes afeuten tanto a les llinies d’ancho ibéricu como a les d’ancho métricu, lo que puede traducise en mayores tiempos d’espera, especialmente nes hores valle.
Llucía F. M
This work is licensed under a Creative Commons Attribution 4.0 International License.
