La Coordinadora Ecoloxista d’Asturies fizo pública la so fonda disconformidá col nuevu procesu d’“Aprovechamientu integral y sostenible del dominiu esquiable” na Estación Invernal de Fontes d’Iviernu, nel conceyu d’Ayer. La organización considera que se trata d’una iniciativa con impactos significativos y negativos tanto a nivel ambiental como social, polo que va presentar alegaciones al proyectu.

Puntu de xunión pente Fuentes y San Isidro, onde tan previstes obres

Dende la Coordinadora adviértese de que l’ampliación de la estación plantega riesgos graves que nun puen ser ignoraos. Más allá de la coyuntura climática desfavorable y del gastu económicu y enerxéticu que supón la producción de nieve artificial, indispensable, señalen que les repercusiones ambientales son asgaya, fondes y, n’última instancia, desconocíes. L’ampliación d’una estación d’esquí implica tresformaciones na alta montaña que, anque queden tapecíes nel iviernu, maniféstense con tola so crudeza’l restu del añu.

La propuesta, que se xustifica baxo l’auspiciu de los planes de desendolcu pa les cuenques mineres, supón una nueva operación d’urbanización d’un espaciu natural ensin criterios reales de caltenibilidá. La Coordinadora alerta de que la instalación de nuevos remontes y la meyora de pistes va requerir l’apertura de pistes forestales y la presencia prolongada de maquinaria industrial pesada, con procesos d’erosión del terrén y destrucción de la vexetación propia de l’alta montaña. Amás, l’acondicionamientu de les lladeres implica desbroces, tales y movimientos de tierra que modifiquen de manera irreversible la orografía del entornu y afecten a ecosistemes sensibles, alterando la fauna y la flora autóctones.

Tamién se pon el focu nel impactu de les infraestructures venceyaes a la carretera y a los aparcamientos, qu’introduciríen miles de coches y autobuses cada temporada, con riesgu de saturación turística y deterioru de la calidá de vida de visitantes y población llocal. La construcción de nuevos edificios de servicios y equipamientos supondría, según denuncien, la destrucción irreparable de la caída escontra’l valle na cara norte del Tonéu.

Otra de les cuestiones que xenera mayor preocupación ye l’afección a los recursos hídricos. La ampliación implicaría alteraciones de los cursos d’agua, canalizaciones y entubamientos, xunto a consumos mui elevaos d’agua pa los cañones de nieve artificial, siempre que les temperatures lo permitan. La Coordinadora recuerda que yá se ta notando cada añu la perda d’aportación nel manantial del que s’abastecen tanto la estación como la zona residencial de la Urbanización La Raya, amás de los problemes de turbidez del agua en periodos de lluvies pola arrastrada d’áridos procedentes de les pistes.

La organización ecoloxista tamién señala l’aumentu de la presión sobre recursos hídricos y enerxéticos nun contestu de cambéu climáticu que amenaza con temporaes cada vez más curties y con menos nieve, lo que dispara los costos de mantenimientu. A ello súmase la perda temporal, y n’ocasiones permanente, de los pastos d’usu ganaderu, lo que pon en riesgu la identidá y la viabilidá del sector ganaderu de la zona.

Respeutu a la posible unión de Fontes d’Iviernu cola estación vecina de San Isidro pela parte baxa, la Coordinadora califica la propuesta de sinsentíu, recordando que dende hai años nun hai nieve nin s’abren dellos telesquís y que la conexón dexaría a los esquiadores nuna situación precaria al cruciar la llende, al tratase de zones fuera de pista y obligar al usu de tresporte por autobús pa llegar a Cebolledo.

La Coordinadora Ecoloxista tamién critica la forma na que se foi ampliando la estación dende los sos inicios, a base de concesiones parciales. Esti proceder, afirmen, evidencia una falta clara de planificación o inclusive una posible intencionalidá pa evitar controles ambientales estrictos que tendríen d’aplicase si’l proyeutu se presentara dende’l principiu na so totalidá. Como exemplu d’esta falta de seriedá, recuerden que de los cientos d’exemplares d’acebu y bidul que se comprometieron a plantar como midida compensatoria, nun salió alantre nengún.

Nesi mesmu sen, denuncien la falta de respetu de l’Alministración a los compromisos mínimos qu’ella mesma fixa, que dempués son modificaos de manera unilateral. El plantegamientu de modificar la Declaración d’Impautu Ambiental pa permitir l’usu de la estación fuera de temporada ye, a xuiciu de la Coordinadora, una prueba más de que nun se ta actuando con criterios reales de sostenibilidá nin de protección del padremuñu natural.

Pa la Coordinadora, tol proyeutu responde en realidá a un aprovechamientu urbanísticu de la zona baxo la escusa de la reactivación económica y del turismu agresivu. La inversión prevista, superior a los 24 millones d’euros, sería namás la punta del iceberg d’un gastu públicu muncho mayor, y recuerden que los datos económicos de la xestión de les estaciones d’esquí amuesen pérdides importantes y recurrentes.

La organización quier dexar claro que nun se trata de demonizar el deporte nin l’actividá física, sinón de llamar a la reflexón sobre les consecuencias de destruir espacios naturales d’altu valor. Dende la Coordinadora Ecoloxista d’Asturies solicítase que se paralice cualquier avance del proyeutu, énte l’esmolecimientu pola conservación del mediu natural y por un desenrollu verdaderamente sostenible, frente a lo que consideren un esbardie de dineru públicu en quimeres insostenibles que beneficien namás a unos pocos intereses privaos.