Carme Pérez Antolín (Andecha Astur) insistió na so intervención na importancia de nun consentir los los machismos “de baxa intensidá”, recordando que’l asesinatu ye la última expresión d’un procesu d’escalada que pasa pol acosu, l’abusu, el maltratu físicu y sicolóxicu o la violación. “Un asesín machista nun se fai de la nueche a la mañana”

Carme Pérez Antolín demientres la so intervención

Decenes de persones tornaron a concentrase ayeri delantre l’edificiu de la Gota Llechi, en Xixón, siguiendo la convocatoria mensual que, cada últimu miércoles de mes, entama la Plataforma Stop Violencies. L’actu sirvió pa visibilizar el doliosu contador de muyeres asesinaes pola violencia machista y pa reiterar la refuga social frente a unos crímenes que, namás nel primer mes del añu, yá dexen ocho víctimes mortales.

Nel trescursu de la concentración lleéronse con solemnidá los nomes de les primeres muyeres asesinaes nesti 2026, d’edades comprendíes ente los 30 y los 78 años. Un xestu cargáu de simbolismu, pensáu pa evitar l’anonimatu y pa recordar que detrás de cada asesinatu machista hai una vida truncada y un entornu familiar y social fondamente estremáu.

L’actu cuntó col sofitu de numberosos colectivos feministes, sindicales y sociales, ente los que se toparon Andecha Astur, Anticapitalistes, Amamantar, l’Asociación de Pensionistes de Xixón, l’Asociación Ecofeminista Petra Kelly d’Asturies, el Colectivu de Trabayadores, Feminismu en Llucha del CSI, la plataforma del Serviciu d’Ayuda a Domiciliu (SAD), Podemos y Verdes–Equo.

Na concentración, Carme Pérez Antolín dio llectura al comunicáu correspondiente al mes de xineru, nel que la Plataforma Stop Violencies recordó que l’entamu del añu con ocho asesinatos machistes nun ye un simple cambiu de cifra, sinón la continuación d’una traxedia que vien de llargo. Asina, recordaron tamién les 94 muyeres asesinaes coles que se zarró l’añu pasáu o les 90 de 2024, una suma de númberos que —como destacaron— son persones, vides perdíes nuna llista inasumible.

Dende la plataforma señalaron que la llectura pública de los nomes de les víctimes nun ye un ritual vacíu, sinón un actu de responsabilidá colectiva frente a una violencia estructural. Una violencia que, según denunciaron, s’alimenta d’un sistema que delles veces mira pa otru llau, falla na protección o minimiza les señales previes.

Nel comunicáu fíxose especial fincapé nel peligru de normalizar los machismos “de baxa intensidá”, recordando que’l asesinatu ye la última expresión d’un procesu d’escalada que pasa pol acosu, l’abusu, el maltratu físicu y sicolóxicu o la violación. “Un asesín machista nun se fai de la nueche a la mañana”, señalaron, denunciando una cultura que pon en dulda a les víctimes, les culpabiliza o blanquea los comportamientos machistes, especialmente cuando los casos algamen relevancia mediática.

La Plataforma Stop Violencies remató l’actu reafirmando’l so compromisu de siguir convocando estes concentraciones mensuales y reclamando tolerancia cero con tolos machismos, incluyíos los denominaos micromachismos. Nun contestu nel que, según advirtieron, paez haber retrocesos en drechos y espacios conquistaos, llamaron a nun baxar la guardia y a siguir denunciando una violencia que sigue cobrándose vides.

Nel Dos Santos

This work is licensed under a Creative Commons Attribution 4.0 International License.