Los paros entamaos na factoría d’ENCE Navia contra l’anunciu de 96 despidos nun son un fechu aislláu nin una cuestión puntual d’una empresa concreta. Son un nuevu síntoma d’un problema estructural que s’arrastra dende hai décades n’Asturies: la perda continuada d’industria, d’emplegu estable y de capacidá productiva.

La movilización de los trabayadores d’ENCE prodúzse, amás, nun contestu nel que los ERE y axustes de plantía en grandes empreses industriales, como ArcelorMittal, vienen repitiéndose ensin que dende les alministraciones s’afite una estratexa clara de defensa del texíu industrial asturianu. Les decisiones empresariales preséntense como inevitables, mientres el país asume, cuasique con resignación, la perda de puestos de trabayu que nunca se recuperen.

Nel casu d’ENCE, la empresa xustifica los despidos en razones de competitividá y reorganización. N’Arcelor, los axustes formen parte d’una dinámica más amplia de reestructuración del sector siderúrxicu a nivel estatal y europeo. Pero el resultáu ye’l mesmu: menos emplegu industrial, más precariedá y mayor dependencia d’un modelu económicu basáu nos servicios y el turismu.

Cada despidu industrial nun ye solo una cifra. Ye un golpe direutu a la economía asturiana, a la cohesión social y a la posibilidá de que la mocedá atope n’Asturies un trabayu dignu y estable. Cuando una planta industrial adelgaza, el país adelgaza con ella: pierden les families, pierden los conceyos y pierden les xeneraciones futures.

Resulta especialmente esmoleceor que, mientres se producen estos conflictos llaborales, el discursu institucional siga centrando’l futuru económicu d’Asturies n’apuestes que nun sustitúin la industria, como’l turismu o proyeutos decidíos dende fuera, ensin control real nin planificación a llargu plazu. La industria, que foi durante décades la columna vertebral del país, queda relegada a un papel secundariu, vulnerable a decisiones empresariales que s’afiten lloñe de la realidá asturiana.

Los paros d’ENCE y los ERE d’Arcelor nun son episodios desconeutaos. Son parte d’un mesmu procesu: la normalización de la perda industrial. Y mentanto esta normalización siga, Asturies va siguir perdiendo emplegu, población activa y futuru.

L’alderique que s’abre güei con ENCE nun pue quedar nel casu concretu. Ye’l momentu d’esixir una política industrial real, que defenda l’emplegu, que garantice actividá productiva y que trate la industria como lo que ye: una cuestión estratéxica de país, non una variable secundaria suxeta a los balances empresariales.

This work is licensed under a Creative Commons Attribution 4.0 International License.