El preslle de la cabera factoría d’Albo en Tapia ye, al final, una noticia llocal con llectura de país: cuando se pierde industria, nun se pierde solo un edificiu nin una marca; piérdese capacidá de decidir. Y eso, n’Asturies, ye un luxu que nun nos podemos permitir.

Con esti preslle finen 150 años d’industria conservera nel conceyu

Tapia va dicir adiós en febreru a la planta d’Albo, una instalación histórica qu’abrió les sos puertes en 1941 y que, dende 1960, tenía en marcha la llinia de fabricación de platos precocinaos que se facía na villa.

La empresa —güei nel grupu pesqueru chinu Shanghai Kaichuang— decidió treslladar esa producción a Salvaterra de Miño (Pontevedra) y ufiertó a les nueve persones emplegaes n’Asturies emigrar a Galicia.

Albo ye una marca del mundu pesqueru, y Tapia ye mar.

La pesca y la industria alimentaria fueron —y pueden siguir siendo— dos cares de la mesma moneda: una da materia prima, la otra da valor amestáu, estabilidá y capacidá pa competir. Cuando la transformación desapaez del mapa, el sector pesqueru queda más espuestu: más dependencia d’intermediarios, menos retornu llocal, y menos oportunidaes pa que la xente moza vea futuru ensin marchar.

Nun ye que’l puertu vaiga parar mañana, pero sí ye otra forma de dicinos que la cadena económica va facese cada vegada más curtia equí… y más llarga fuera.

La noticia nun se mide solo n’esos nueve puestos de trabayu perdios —que yá ye abondo pa un conceyu pequeñu—, sinón nel mensaxe que trai debaxo’l brazu: la desindustrialización sigue avanzando pasu a pasu, ensin facer muncho ruíu, pero dexando la mesma sensación que la resaca na mar: primero quita, dempués arreniega, y al final dexa’l terrén llimpiu… pa otros usos.

Qu’una planta cierre nun ye nunca “namás” un preslle. Ye una pieza menos d’un tableru que yá vien dañándose dende va décades. Cuando cola una industria, nun s’esfuma solo’l trabayu direutu: van tamién detrás les empreses auxiliares, el movimientu de transporte, la vida cotidiana y la posibilidá de seguir viviendo nel to conceyu, nel to país; la perda d’actividá industrial significa tamién menos capacidad pa xenerar valor equí, n’Asturies, y más dependencia de decisiones tomaes fuera.

¿Y agora qué? Pues ya se sabe: mina o turismu (y a vivir con ello) A los tapiegos, si la industria s’apaga, siempres-yos queda la versión “del futuru” que nos venden por fascículos: o vivir envelenaos pola eterna amenaza d’una mina d’oru en Salave, con tolo que trai d’enfrentamientu social y deterioru ambiental, o vivir invadíos por un turismu que dexa perres unos meses a unos pocos, xenera l’emplegu más precariu y pide que’l pueblu se convierta nuna postal permanente.

Nel Dos Santos

This work is licensed under a Creative Commons Attribution 4.0 International License.