Industria militar n’Asturies: campaña d’Andecha Astur escontra la guerra

L’anunciu de la implantación d’Indra n’Asturies reabre’l debate sobro’l modelu industrial del país, la dependencia estratéxica y la falta de participación social nes decisiones clave.

L’anunciu del grupu empresarial Indra de convertir Asturies nun enclave estratéxicu pa la so espansión industrial y teunolóxica supunxo un nuevu elementu nel alderique sobro’l modelu de desarrollu económicu d’Asturies. La empresa prevé reforzar la so actividá n’espacios como El Tallerón (Xixón) y participar en proyeutos venceyaos a sistemes tucnolóxicos y de defensa, nel marcu de contratos estatales impulsaos dende Madrid.

Dende’l ‘Principado’ valoróse positivamente la operación, destacando la xeneración d’emplegu cualificáu y la diversificación industrial. Sicasí, acullá del discursu institucional, la implantación d’Indra abre interrogantes de fondu sobro la orientación estratéxica de la economía asturiana y sobro’l papel que se-y quier asignar al país dientro del modelu productivu estatal.

Industria, defensa y dependencia estratéxica

Una parte sustancial de l’actividá d’Indra ta diructamente venceyada a la industria de defensa, a programes militares y a sistemes d’armamentu. Esti fechu, conocíu y documentáu, nun ye un elementu secundariu, sinón central nel so modelu de negociu. La llegada de la empresa a Asturies tien, polo tanto, implicaciones que van muncho más allá del emplegu o la inversión inmediata.

Nesti contestu, Andecha Astur vien manifestando una posición clara y caltenida nel tiempu: la oposición a fundamentar el futuru económicu d’Asturies na industria de la guerra, defendiendo que nun ye éticamente asumible apostar por un modelu productivu que depende del conflictu, del aumentu del gastu militar y de la militarización de les rellaciones internacionales.

Campaña y moratoria pa Naval Azul

Amás de la crítica xeneral, Andecha Astur ta desencolcando una campaña pública escontra la implantación d’Indra n’Asturies y pidió una moratoria pa que la empresa nun opere nel espaciu de Naval Azul. Pa la organización, la posible utilización d’esi suelu estratéxicu p’actividaes venceyaes a la industria armamentística supón una decisión política de gran caláu, tomada ensin un alderique social real nin participación ciudadana.

Dende Andecha Astur señálase que Naval Azul debería destinase a usos d’interés públicu, venceyaos a la innovación civil, a sectores productivos socialmente útiles y a un desarrollu económicu sostenible y non militarizáu.

La cuestión ética nel centru del debate

La discusión sobro Indra nun se llenda a una cuestión téunica o económica. Ye, sobre manera, una cuestión ética y política. P’Andecha Astur, l’argumentu del emplegu —siendo importante— nun pue sirvir pa xustificar cualisquier tipu d’actividá económica, defendiendo qu’Asturies precisa industria y trabayu, pero non a cualquier preciu nin a costa de consolidar un modelu basáu na producción de medios pa la guerra.

La reconversión industrial del país, argumenten, tendría d’orientase a sectores como la investigación civil, les enerxíes renovables, la tucnoloxía al serviciu social y el refuerzu de los servicios públicos, y non a la dependencia d’una economía militarizada suxeta a decisiones qu’escapen del control democráticu d’Asturies.

Falta de poder políticu y ausencia de debate

La implantación d’Indra vuelve poner de manifiestu un problema estructural: la falta de poder políticu real d’Asturies pa decidir el so modelu industrial y económicu. Les grandes decisiones sobro defensa, industria y inversión estratéxica siguen viniendo marcaes dende Madrid.

Ensin soberanía política, cualquier anunciada “apuesta de futuru” cuerre’l riesgu de convertise nuna nueva forma de dependencia. La cuestión, polo tanto, nun ye namás si Indra crea emplegu, sinón qué tipu d’industria quier Asturies, con qué valores y con qué capacidá de decisión propia.

Un alderique imprescindible

La llegada d’Indra a Asturies nun ye un fechu neutru nin meramente económicu. Ye una decisión política con consecuencies de llargu plazu. La campaña d’Andecha Astur y la petición de moratoria pa Naval Azul ponen enriba la mesa un debate que nun pue siguir aplazándose: el futuru industrial del país, la ética del desarrollu y la capacidá d’Asturies pa decidir por sigo mesma.

This work is licensed under a Creative Commons Attribution 4.0 International License.