Ye digno de mención el llabor que ta desendolcando
horru_online, @horru_online, na defensa d’horros y paneres asturianos

El Ministeriu de Cultura del Estáu español incoó apocayá l’espediente pa declarar los hórros del norte peninsular como manifestación representativa del patrimoniu cultural inmaterial. La resolución, espublizada nel Boletín Oficial del Estáu (BOE), abre un procedimientu de reconocimientu estatal que busca destacar el valor históricu, etnográficu y simbólicu d’estes construcciones tradicionales presentes n’Asturies, Galicia, Cantabria y Castiella y Lleón.

Sicasí, esta figura de protección nun lleva apareyada de mou automáticu nenguna obligación de financiación nin de conservación material. La declaración tien un calter fundamentalmente simbólicu y de visibilidá cultural, mentes que les competencies reales en materia de caltenimientu y restauración siguen recayendo nes comunidaes autónomes y, en bona midida, nes persones propietaries.

N’Asturies, la noticia foi recibida con satisfacción institucional, pero tamién con crítiques dende ámbitos culturales y patrimoniales, que recuerden que’l principal problema de los hórros nun ye la falta de reconocimientu, sinón la escasez de recursos públicos destinaos a la so conservación efeutiva.

Dende N’AST, organización venceyada a la defensa del patrimoniu cultural asturianu, señálase que’l presupuestu del Principáu pa esti fin resulta claramente insuficiente. L’asociación alerta de que la mayor parte de los horros y paneres dependen del esfuerciu económicu de particulares —en munchos casos persones mayores o propietarios de zones rurales despoblaes— que nun cuenten con ayudes abondoses nin con sofitu téunicu estable.

La consecuencia ye visible nel territoriu: cada añu piérdense decenes d’horros por abandonu, deterioru estructural o colapsu, ensin que se pongan en marcha planes d’emerxencia nin estratexes integraes de protección. A pesar de tratase d’un elementu icónicu del paisaxe cultural asturianu, la conservación sigue siendo irregular, discontinua y, en munchos casos, puramente testimonial.

Les crítiques apunten a una contradicción de fondu: declárase patrimoniu aquello que, na práctica, déxase esbarrumbar. Pa los colectivos patrimoniales, la incoación del espediente estatal tendría que ser l’ocasión pa reforzar les polítiques autonómiques de caltenimientu, con llinies presupuestaries estables, ayudes suficientes y una planificación a llargu plazu.

Mentanto eso nun ocurra, el riesgu sigue siendo’l mesmu: que los horros permanezan nos discursos oficiales y nos documentos alministrativos, pero desapaezan del paisaxe real, llevando con ellos una parte fundamental de la memoria rural d’Asturies.

This work is licensed under a Creative Commons Attribution 4.0 International License.