Concentración contra l’intervencionismu d’EEXX

La plaza l’Institutu de Xixón, conocida popularmente como’l Parchís, volvió a ser ayeri escenariu d’una concentración contra la política esterior d’Estaos Xuníos. Baxo’l llema «Manes fuera de Venezuela», un abondosu grupu de persones xuntóse pa denunciar la intervención estadounidense nel país llatinoamericanu ya’l secuestru del presidente venezolanu, Nicolás Maduro

La movilización foi convocada pola plataforma Asturies contra l’imperialismu y pola paz, que vien protagonizando distintes aiciones dende que se produxo l’arrestu de Maduro y la posterior operación impulsada pol presidente estadounidense, Donald Trump. Yá nos díes siguientes a esos fechos, cientos de persones concentrárense nel mesmu llugar pa espresar el so refugu a la escalada d’inxerencia.

Dende la organización, los convocantes defendieron que la protesta buscaba “la soberanía de Venezuela y el drechu de los pueblos a decidir el so futuru”, amás de reivindicar la soberanía d’América Llatina y el Caribe frente a lo que calificaron como una política d’amenaces, agresiones y tuteles impulsada dende Washington. Nel comunicáu lleíu durante la concentración tamién se criticó la normalización d’estes intervenciones per parte de la comunidá internacional.

La concentración valió tamién como espaciu de reflexión sobre la situación del Drechu Internacional. Dende la tribuna, dellos intervinientes plantegaron la perda de validez práctica de los convenios, trataos y mecanismos de contrapesu que, según afirmaron, quedaron desautorizaos tres episodios como’l xenocidiu en Palestina y les intervenciones militares más recientes.

“¿Qué sentíu tien siguir enseñando Drechu Internacional Públicu cuando na práutica foi declarau muertu?”, cuestionaron, apuntando non solo a les acciones de Trump, sinón tamién a lo que consideren la sumisión y cobardía del restu de países. Nel mesmu sentíu, recordóse que’l Drechu Internacional Humanitariu naciera como ferramienta de supervivencia tres la Segunda Guerra Mundial, y que güei ta siendo sistemáticamente vulneráu.

Según los convocantes, la rotura directa del orde internacional abrió la puerta a una nueva etapa marcada pola llei del más fuerte, el colonialismu más agresivu, el saqueu de recursos, la piratería y el xenocidiu, con estaos poderosos actuando con total impunidá gracies a la so superioridá bélica.

Durante la concentración tamién se fixo referencia a les movilizaciones que tán produciendose n’otros puntos del mundu. Dende Venezuela y Colombia, onde se desarrollen protestes en defensa de la soberanía, hasta les movilizaciones nel propiu territoriu estadounidense nes que se denuncien les actuaciones de les fuercies de seguridá y les operaciones militares n’esterior.

Amás, recordóse la situación de Nicolás Maduro y de la so esposa, Flores, que, según los organizadores, permanecen rexistraos nun centru penitenciariu de Brooklyn, lo que motivó concentraciones de protesta delantre d’esi recintu.

La movilización d’ayeri coincidió, amás, cola llegada a Venezuela d’un avión cargáu con tonelaes de medicamentos, destinaos a sustituir los que, según denunciaron, resultaron destruyíos nel bombardeu estadounidense producíu’l sábadu anterior.

La concentración zarró con un llamamientu a caltener la presión social y a reforzar la solidaridá internacional frente a lo que los convocantes consideren una nueva ofensiva imperialista que amenaza la soberanía de los pueblos.

Nel Dos Santos

This work is licensed under a Creative Commons Attribution 4.0 International License.