La entidá espubliza dos plantíes adaptaes pa distintos niveles, col envís d’afitar l’idioma nel entornu familiar nes fiestes navidiegues. La iniciativa pretende normalizar l’asturianu nel ámbitu familiar y festivu, más allá del entornu escolar.

Iniciativa pol Asturianu vien de llanzar una campaña cola que busca que la reciella incorpore l’asturianu a una deles cellebraciones que más presten a la reciella: la carta a los Reis Magos. La organización asoleyó dos modelos de carta redactaos íntegramente n’asturianu, pa facilitar que los neños y neñes pidan los sos regalos na llingua propia.

Les plantíes tán pensaes pa responder a la diversidá de la reciella: hai versiones cencielles pa los más pequeños y otres con mayor desendolcu pa quien tien yá dalgún grau d’autonomía llingüística. La asociación sorraya que’l papel de les families ye clave, y anima a pas, mas o tutores a collaborar nel procesu d’escritura, pa que la esperiencia seya compartida y significativa.

La campaña tien un doble envís. Per un llau, reforciar la presencia social del asturianu en contestos afectivos y de cellebración; y per otru, favorecer la tresmisión del idioma ente xeneraciones, aprovechando momentos de gran carga emocional y simbolismu cultural.

«Queremos que la reciella sienta que l’asturianu nun ye solo un idioma d’aula, sinón una ferramienta pa espresar ilusión, creatividá y afectu», esplica la entidá nuna nota espublizada a los medios. «Les fiestes son un territoriu natural pa la llingua y un puntu d’alcuentru emocional pa que siga viva», añaden.

Los modelos pueden descargase de baldre en formatu PDF, llistos pa imprentación. Tán disponibles nel portal dixital de la organización y tamién nes sos canales sociales, col oxetivu d’averar los materiales tanto a les families como a los centros educativos y servicios de normalización llingüística que quieran espardelos.

Susana Sela

This work is licensed under a Creative Commons Attribution 4.0 International License.