La información fecha pública en dellos medios de comunicación sobre la implantación d’una industria de producción d’armamentu de la empresa INDRA na planta del Tallerón, asitiada nos terrenos históricos del astilleru Naval Xixón, fixo saltar les alarmes sociales y polítiques
Xixón vive estos díes un debate crucial sobre’l futuru de la so fachada marítima. Dende’l gobiernu municipal, al tiempu que presumen de Naval Azul comu espaciu caltenible y ‘ecofriendly’ señalen los ‘beneficios’ económicos de la operación, insistiendo na xeneración d’actividá económica y emplegu, pero ensin entrar a valorar nin desplicar les gravísimes implicaciones sociales, étiques y urbanístiques que supón un proyeutu d’estes carauterístiques, más entá nun espaciu públicu emblemáticu y nun contestu urbanu residencial.
P’Andecha Astur, esta decisión supón un quiebre col compromisu públicu que dio nacencia al proyeutu Naval Azul. Según los documentos oficiales y la propia web municipal, Naval Azul diba ser un referente d’economía azul, investigación marina y recuperación del frente marítimu pa usu y disfrute de la ciudadanía, impulsando un modelu de rexeneración industrial caltenible pa la Zona Oeste de Xixón. L’apuesta institucional falaba d’un equilibriu ente’l llegáu históricu marineru de la ciudá y el desendolcu d’una industria puntera, lligada a sectores como la bioteunoloxía marina, les enerxíes renovables, l’alimentación o la movilidá sostenible. Sicasí, la organización nacionalista considera que nun hai manera d’armonizar esti plantegamientu estratéxicu col desendolcu paralelu d’una industria militar nel mesmu espaciu. Nun se trata solo d’una incoherencia discursiva, sinón d’un cambéu de fondu que nun foi nin anunciáu nin debatíu públicamente, y que trai consigo un modelu industrial y económicu contrariu a los principios de caltenibilidá, paz social y recuperación d’espacios públicos que se defendieron nel plantegamientu inicial.
Andecha Astur sorraya que la producción militar nun ye una industria neutra, sinón que forma parte d’una cadena económica y política que condiciona l’usu de los recursos públicos y los modelos de prioridá social. La inversión y la producción n’armamentu, recuerden, desvíen recursos que podríen destinase a servicios sociales, fomenten una lóxica d’escalada belicista y sitúen un espaciu urbanu residencial nun escenariu d’interés estratéxicu militar, con tolos riesgos que d’ello se deriven nun contestu global inestable y marcáu polos conflictos armaos. Pa la organización, el futurible proyeutu de Naval Azul nun pue convertise, ensin más, nun polu d’industria de la guerra camufláu col argumentu únicu de la creación d’emplegu. La ciudadanía xixonesa tien derechu a conocer los detalles de la operación, a participar activamente nel procesu y a disponer de garantíes d’impautu ambiental, social y éticu, ellaboraes por entidaes independientes y con criterios rigurosos y tresparentes.
Nesti sen, Andecha Astur reclama un debate social fondamente democráticu, que nun se llende a la confrontación mediática, sinón que se tresllade a la cai y a los mecanismos de participación vecinal. “La ciudadanía nun pue enterase pela prensa de que’l proyeutu que-yos prometieron camudó d’orientación. Naval Azul tien de ser un exemplu real de transición ecolóxica, recuperación del frente marítimu y reindustrialización sostenible d’un espaciu históricamente castigáu pola desdexadez institucional”. Per esi motivu, Andecha Astur pide una moratoria inmediata de cualisquier trámite d’autorización d’actividá industrial armamentística nos terrenos de Naval Azul, fasta que nun s’abra un procesu d’información pública, participación vecinal y votación social sobre’l cambéu de direición del proyeutu. Porque, como sorraya la organización, nun val too cola escusa del emplegu, y el Xixón del futuru tien de construyise dende la coherencia, la xusticia social y el respetu a la voz del pueblu.
Llucía F. Marqués
This work is licensed under a Creative Commons Attribution 4.0 International License.
