Ca vegada que n’Asturies se fai un xestu pa recuperar identidá, apaez daquién berrando “tradición falsa”. Esta vegada fo’l diputáu de Vox nel ‘Principado’, Javier Jové, que decidió usar les redes sociales pa cargar escontra L’Anguleru, acusándolu de ser un inventu nacionalista y d’atentar escontra la “Navidá auténtica”. Una Navidá que, polo visto, vien con manual oficial, sellu estatal y distribución en cadena

La retranca ta en que quien fala de tradiciones falses suel defender con entusiasmu personaxes y rituales que, esos sí, tienen una hestoria bien reciente y bien documentada. Papá Noel, por exemplu, l’iconu universal que güei inunda escaparates y anuncios, ye un productu del marketing del sieglu XX, fixáu definitivamente pola campaña publicitaria de Coca-Cola nos años trenta. Nun ye medieval, nin ancestral: ye colloráu, barbáu y capitalista. Pero esi, curiosamente, nun estorba.

Tampoco nun paecen molestar otres “tradiciones eternes” como les doce uves, o’l roscón de reis, que llegaron n’Asturies bien entráu’l sieglu XX, espardíes pola televisión y la imitación madrilana, nin la cabalgata de Reis, un espectáculu urbanu xeneralizáu demientres el franquismu como parte d’una política clara d’unificación cultural. Ritual tras ritual, ensin raigañu nel país, fueron imponiéndose como norma, fasta faer creer que siempres tuvieron ehí. Eso tien nome: asimilacionismu colonialista.

El problema, entós, nun ye que L’Anguleru seya “inventáu”. El problema ye que nun ye un inventu del Estáu, nin del mercáu global, nin de la televisión. Ye una iniciativa cultural que pretende recuperar una manera d’entender les fiestes d’iviernu dende Asturies, con referentes propios, con llingua propia y con símbolos que nun mos vienen impuestos dende fuera.

Y sí, ye verdá: recuperar les fiestes tradicionales ye enforma abegoso. Non porque nun esistieren, sinón porque la presión mediática y españolista de décades fixo cuasi imposible que sobrovivieren ensin ser folclorizaes, caricaturizaes o sustituyíes. Frente a esi panorama, propuestes como L’Anguleru nun sustitúin nada: abren espaciu, llanten una alternativa y recuerden que la cultura nun ye un muséu inmóvil, sinón un campu de disputa.

Que L’Anguleru xenere reacción ye, de fechu, bona señal. Sinifica que toca dalgún nerviu. Que france la falsa naturalidá de lo impuesto. Que recuerda que les tradiciones nun son neutres, nin inocentes, nin etenres: son polítiques. Y que cuando daquién se pon nerviosu porque un país intenta contase a sigo mesmo, ye porque esi país entama a dexar de callar.

Asina que menos lleciones sobro “tradiciones verdaderes” y más honestidá histórica. Porque si vamos falar d’inventos, convendría empezar polos que vienen con llogotipu, campaña publicitaria y bendición estatal.

L’Anguleru, polo menos, nun vien de Coca-Cola.

Fonsu Braña

This work is licensed under a Creative Commons Attribution 4.0 International License.