El postrer númberu del añu de la Revista LA SIDRA ábrese con un entamu que ye, al mesmu tiempu, balance, declaración d’intenciones y llamamientu a la responsabilidá colectiva. Un testu que parte d’una imaxe fondamente sidrera —la sidre nuevo formientando en pipes y tinos— pa reflexonar sobro l’estáu actual del sector y les perspeutives que s’anuncien dende l’ámbitu políticu.

L’entamul enumbera con claridá los grandes retos pendientes de la cultura sidrera asturiana: la escasez de mazana autóctono, la necesidá de recuperar el consumu, la diversificación y meyora de la calidá, el reconocimientu profesional del echaor, la aplicación efeutiva de la llexislación sobro sidreríes, la presión urbanístico y turístico sobro les pumaraes, l’aculturización que llenda l’accesu de la mocedá a la sidre y, como fondu estructural, la falta d’un Plan Estratéxicu de la Mazana y la Sidre que dea coherencia a toles polítiques del sector.

Nun hai concesiones al trunfalismu. El testu asume con realismu que’l sector ta avezáu a escuchar bones pallabres acompañaes de pocos fechos, y qu’el escepticismu ye una actitú lóxica dempués d’años d’anuncios incumplíos. L’entamu fai memoria, amás, de que l’añu que fina nun destacó precisamente polos cumplimientos, con dalgunes esceiciones concretes, como la presencia institucional na Feria Muestres o’l refuerzu de la Cátedra de la Sidre d’Asturies. Especialmente crítica ye la valoración de la celebración del aniversariu del reconocimientu pola UNESCO, marcáu —según el testu— pola improvisación yel desenfotu.

Sicasí, l’editorial nun queda na crítica. El so tonu ye, finalmente, afirmativu y confiáu na fuercia social de la sidre. La esperanza nun se deposita tanto nes promeses polítiques como nel compromisu d’una sociedá asturiana que sigue apostando pola so cultura sidrera y pola so identidá. Ye esa presión social —vien dicir el testu— la que obliga a los responsables públicos a mover ficha, anque seya pasu ente pasu.

Nun falta tampocu la referencia a la “anti-Asturies”, a esi discursu recurrente que xurde cada vez que la sidre, la llingua o la cultura propia ganen espaciu públicu. L’entamu denuncia con claridá la hipocresía de quien ve normal incorporar tradiciones vitivinícoles al ámbitu escolar n’otros territorios, pero fala d’adoctrinamientu o d’alcolismu cuando se trata de sidrocoles o amagüestos n’Asturies. Una postura que, llueu de tantos años, queda retratada como una oposición sistemática a too lo que suene a identidá asturiana.

L’entamu d’avientu de LA SIDRA fina con una imaxe poderosa y fondamente simbólica: la sidre nuevo faciéndose. Frente a la incerteza, a les promeses y a los retrasos, la sidre sigue cumpliendo col so ciclu. Y nesa constancia, nel trabayu silenciosu de llagares y pumaraes, atopamos quiciabes la metáfora más certera del sector: resistencia, continuidá y futuru.

Un testu que convida a cerrar l’añu con espíritu críticu, pero tamién con convicción. Porque, como recuerda l’editorial, hai promeses que fallan… y otres —como la sidre— que nunca falten.

This work is licensed under a Creative Commons Attribution 4.0 International License.