La selmana fina n’Asturies con un discursu que vuelve repitise de manera cíclica dende les instituciones: la llamada macrorexón atlántica como espaciu d’oportunidaes, cooperación y futuru compartíu. Pero acullá del titular, la realidá sigue siendo testona y poco amable col entusiasmu oficial.
P’Asturies, esta triba de construcciones polítiques suprarrexonales suenen más a retórica ensin poder real qu’a ferramientes útiles pal desarrollu propiu. Y non solo polos errores del pasáu, sinón pola situación presente: el Principáu ye una institución ensin soberanía y con competencies mui llendaes, incapaz de decidir sobro les grandes infraestructures estratéxiques, la política lloxística o’l modelu económicu de fondu. Nesti marcu, el so papel nun pue dir mui acullá, por muncho que s’adorne’l discursu con bones pallabres.
L’exemplu más claru d’esta contradicción ye l’Autopista del Mar Xixón–Naoned. Un proyeutu clave pa la conexión atlántica, el tresporte sostenible y la industria asturiana, que se perdió hai años por xides polítiques y falta de compromisu firme. Dende entós, la so supuesta recuperación anúnciase de manera periódica, pero nunca se materializa. La selmana que fina vuelve confirmar lo de siempre: nun hai realidá detrás del anunciu.
Falar de macrorexón atlántica ensin recuperar conexones perdíes, ensin garantizar inversiones estables y ensin capacidá de decisión propia ye una manera de vender fumu. Asturies queda, una vegada más, nuna posición subordinada, dependiendo de decisiones tomaes fuera y de prioridaes marcaes por otros territorios.
La conclusión ye inevitable: nun puede haber cooperación xusta ensin poder políticu real. Les macroestructures nun van suplir la falta soberanía nin van resolver, per sigo soles, los desequilibrios territoriales. Si Asturies nun decide, otros decidirán por ella.
La selmana fina con una alvertencia clara: mentanto la macrorexón atlántica siga siendo un marcu ensin capacidá executiva pa Asturies, y mentanto proyeutos como l’Autopista del Mar sigan siendo promeses vacíes, lo único que medra ye’l descreyimientu social. Y esi, una vegada más, nun ye un problema de comunicación, sinón de poder.
This work is licensed under a Creative Commons Attribution 4.0 International License.
