L’activación del estáu d’alerta por contaminación atmosférica na zona oeste de Xixón nun ye un fechu aislláu nin inesperáu. Al contrariu, forma parte d’una dinámica repetida que se vien dando dende hai años y que pon de manifiestu un problema estructural de calidá del aire, especialmente nos barrios más próximos a la zona industrial y portuaria
Los datos de les estaciones oficiales de midida, en particular la d’El Lloredal, amuesen superaciones frecuentes de los valores de referencia de partícules PM10 y PM2,5, contaminantes estrechamente rellacionaos con problemes respiratorios y cardiovasculares. Anque los llímites llegales marcaos pola normativa estatal nun siempres se superen, los valores rexistraos sí tán per enriba de les recomendaciones de la Organización Mundial de la Salú, muncho más estrictes y basaes en criterios sanitarios.
Nesti contestu, resulta imposible nun señalar el papel que xueguen ArcelorMittal y otres empreses del entornu industrial del oeste xixonés. La concentración d’actividaes siderúrxiques, l’almacenamientu y manipulación de graneles nel puertu d’El Musel, y el tráficu pesáu asociáu xeneren un impactu ambiental continuu que recái, principalmente, sobre la población residente.
Distintos colectivos vecinales y ecoloxistes vienen denunciando dende va tiempu que les emisiones industriales, tanto canalizaes como difuses, contribúin de manera decisiva a los episodios de mala calidá del aire. Estos episodios intensifíquense en situaciones meteorolóxiques adverses, como la falta de vientu o la inversión térmica, pero la so causa de fondu ye permanente.
L’activación del protocolu municipal —con restricciones al tráficu, recomendaciones a la ciudadanía y avisos a les empreses— ye una midida necesaria, pero claramente insuficiente. Llendar la velocidá o prohibir temporalmente’l pasu de camiones nun ataca el reigañu del problema: un modelu industrial que sigue teniendo prioridá sobre la salú pública.
Mientres les alministraciones insisten en tratar la contaminación como un fenómenu puntual, los datos amuesen que la zona oeste de Xixón soporta una carga contaminante crónica, con niveles medios añales superiores a los deseyables. Esta situación xenera una desigualdá ambiental evidente: non tolos barrios de la ciudá alienden el mesmu aire.
La evidencia científica ye clara: la esposición continuada a partícules fines tien efeutos direutos sobre la esperanza y la calidá de vida. Nun se trata solo d’episodios de molestia o fedores, sinón d’un problema de salú pública qu’afecta de manera especial a reciella, persones mayores y colectivos vulnerables.
Por ello, la situación del oeste xixonés esixe decisiones valientes: controles más estrictos de les emisiones industriales, mayor tresparencia nos datos, y una revisión seria del encaxe ente actividá económica y drechu a un mediu ambiente saludable. L’alerta por contaminación nun debería ser vista como una anécdota estacional, sinón como la confirmación d’un fracasu colectivu que ye necesario encarar.
La contaminación del aire en Xixón, y mui especialmente na so zona oeste, nun ye un problema nuevu nin desconocíu. Lo que sigue faltando ye la voluntá política de poner llímites reales a quien contamina. Mientres eso nun ocurra, los protocolos d’alerta van siguir activándose y los vecinos van siguir pagando colos sos pulmones un modelu que, a estes altures, resulta incaltenible.
Llucía F. Marqués
This work is licensed under a Creative Commons Attribution 4.0 International License.
