El ministru de Cultura, Ernest Urtasun, anunció nel Congresu que, a partir de 2026, los Premios Nacionales de Lliteratura van poder premiar tamién obres escrites n’asturianu. La noticia marca un momentu históricu pa la llingua, que mientres décades quedó fora d’unos galardones que sí reconocíen creación en castellán y nes demás llingües con oficialidá.

Urtasun valoró esta midida como «una demanda histórica qu’agora se ve con xusticia reconocida», dientro d’un trabayu que, según esplicó, busca reforzar la presencia de toles llingües del Estáu nes polítiques culturales. L’anunciu enmarca les actuaciones del Ministeriu pa meyorar l’espardimientu de les llingües cooficiales y d’aquelles que, como l’asturianu, tienen reconocimientu estatutariu pero nun cuenten cola protección plena que da la oficialidá.

La entrada del asturianu nos Premios Nacionales supón un avance simbólicu de gran valor, que pon de manifiestu que la cultura asturiana tien espaciu y reconocencia fuera d’Asturies. Un pasu más na senda que demuestra que, cuando hai voluntá política, la diversidá llingüística ye una riqueza y non un problema. 

La midida llega n’un contestu nel que se vaigan abriendo puertes a la normalización social del asturianu por parte d’instituciones estatales y espacios internacionales, al tiempu que contrasta col inmovilismu del Gobiernu asturianu, que lleva años tornando la reforma estatutaria pa reconocer la oficialidá. 

Susana Sela