L’ampliación del Hospital Universitariu de Cabueñes torna sufrir un nuevu retrasu. Yá ye difícil siguir la llista d’anuncios, plazos incumplíos y promeses que’l Gobiernu del ‘Principado’ lleva amontonando dende hai años pa una obra que ye estratéxica pa Xixón y pa tol ária sanitaria V. Pero lo que yá escomenzó siendo una mala xestión conxúntase agora con un clima d’indignación social xorreciente, al entender munches organizaciones —como la CSI y Andecha Astur— qu’estos retrasos sistemáticos nun son un simple problema burocráticu, sinón una deriva pelligrosa: debilitar la sanidá pública y favorecer, direutamente o non, el negociu de la sanidá privao.

Un retrasu más que tien responsables y consigue beneficiarios

El proyeutu de modernización y ampliación de Cabueñes, que debía convertir el hospital nun referente teunolóxicu y asistencial, arrástrase entrabancáu n’errates de planificación, sobrocostos, concursos fallíos y promeses polítiques que van quedando en ná. Metantu, Xixón sigue dependiendo d’un hospital saturáu, con esperes llargues, plantíes somorguiaes y servicios que trabayen al llímite.

Pero esti deterioru nun repercute igual pa tolos actores del sistema. Mentes la pública queda ensin medios nin espacios, la sanidá privao gana cuota mercáu, aumenta actividá y ve medrar les derivaciones. Una realidá que la CSI vien denunciando repetidamente: “retrásase lo público, xorrez lo priváu”, una ecuación tan cenciella como llamativa.

La denuncia d’Andecha Astur: «Desdexar la sanidá pública ye privatizala»

Andecha Astur foi entá más direuta nes sos valoraciones. Pa la formación soberanista, lo que ta pasando con Cabueñes nun ye un problema aislláu, sinón la prueba palpable d’una estratexa política pelligrosa.

Según manifestaron estes últimes selmanes, “desdexar la sanidá pública ye otra forma de privatizarla, a costa del sufrimientu, cuandu non de la vida, de los pacientes”. Nesti sen, recuerden que’l retrasu d’un hospital nun s’escribe en términos fríos d’infraestructures: traduzse n’operaciones que nun se programen a tiempu, urxencies colapsaes, plantíes exhaustes y xente que nun llega a l’atención que precisa.

Andecha Astur enfatiza qu’esta situación nun ye un accidente nin una fatalidá: ye consecuencia direuta d’un modelu de xestión que nunca priorizó de verdá la sanidá pública, malpenes la utilizó como titular políticu.

CSI: “El retrasu perpetuu ye un ataque direutu a Cabueñes y a la ciudadanía xixonesa”

La CSI, ún de los sindicatos más activos na denuncia de la precariedá sanitaria, lleva meses alertando que Cabueñes camina escontra una situación insostenible. Pa la organización, esti nuevu retrasu confirma lo qu’advirtieren hai tiempu: que’l Gobiernu del ‘Principado’ se ta desentendiendo d’un proyeutu imprescindible, mentanto xorrez la presión pa recurrir a servicios privaos.

Critiquen tamién que los plazos s’anuncien “con total impunidá”, ensin que dengún responsable asuma les consecuencies d’una xestión “errática, improvisada y perxudicial pa la ciudadanía”.

La ciudadanía, la gran perxudicada

Toos estos retrasos tienen una única víctima: la población de Xixón y del ária sanitaria. Cabueñes recibe una demanda xorreciente añu tres d’añu, con un avieyamientu aceleráu y unos servicios qu’a pesar d’esforciase, nun puen compensar la falta d’espacios nin de recursos.

Un hospital n’obra permanente ye un hospital que nun pue planificar.
Un hospital que nun xorrez ye un hospital que retrocede.
Y un hospital públicu que retrocede ye un regalu pa lo privao.

Nesi silenciu incómodu, xorrez la sospecha

El Gobiernu afirma que’l retrasu vien motiváu por custiones téuniques y de contratación, pero la falta de tresparencia alimenta la sensación de que Cabueñes nun ye una prioridá política real. Y cuando lo público falla, lo privao siempres apaez como “solución”.

Xustamente lo que denuncien organizaciones sociales, sindicales y polítiques: una deriva mui pelligrosa pa un serviciu que tien que ser universal, de calidá y plenamente públicu.

Una esixencia que se repite: Cumplir lo comprometío y blindar la sanidá pública

Énte esti nuevu retrasu, CSI, Andecha Astur y delles asociaciones de la ciudadanía reclamen que’l ‘Principado’ esponga plazos reales, presupuestos claros y compromisos verificables, y que se dexe d’afalar la collaboración público-privada como fórmula para tapar los furacos d’una pública desatendía.

Porque, como repite Andecha Astur, “nun fai falta vender hospitales pa privatizar la sanidá. Ye abondo con dexalos deteriorase”.

Y Cabueñes ye un exemplu ca vuelta más llaceriosu.

This work is licensed under a Creative Commons Attribution 4.0 International License.