Llucía F. Marqués

Tola selmana colos niveles de contaminación peles ñubes —lliteralmente—; tol mes, en realidá, cuasique tol añu, tola década si m’apuren. Como vecina de Xixón Oeste tengo que reconocelo: nun reconocí l’estáu d’alerta nin m’enteré del protocolu activáu

¿Hebo contaminación? Por supuestu. ¿Perriba de tolo almisible? Ensin dubia. De fechu —y nun lo digo por dicilo—, en casa mio llevamos tola selmana con problemes respiratorios, culpando a una gripe o mormera que nun tien más síntoma que l’afoguín continuu y los picores de güeyos y piel. La ropa blanco que tiendo alborez gris de povisa; les plantes de la ventana tienen un deu de ¿grasa?, nun sé nin cómo llamalo; les ventanes en sí son un dolor, y tolos coches de la rodiada paecen que durmieron baxo una ñube tóxica. Esa ye la nuesa normalidá.

La Coordinadora Ecoloxista denuncia picos de partícules tola selmana, cifres que pasen tolo recomendao ya incluso afeutao pola OMS pa los humanos.

Según se recueye nel RD 34/2023, “cuando se supere o se prevea que se va superar l’umbral d’información o d’alerta del anexu, les alministraciones competentes adoptarán les midíes necesaries d’urxencia ya informarán a la población”. El Plan d’Aición municipal prevé l’adopción d’un protocolu específicu d’actuación en episodios de contaminación del aire pa la zona oeste de Xixón, debío al fechu de que’l protocolu autonómicu vixente nun s’activa pa les situaciones específiques detectaes como les d’estos díes.

El Principáu nun fizo nada; l’Ayuntamientu esperó cuatro díes pa comunicalo. Los vecinos nun mos enteremos de que ta activáu; tampoco sabemos en qué consiste. Albidramos que nun ye mui eficiente.