Dientro del xorreciente programa d’adoctrinamientu institucional y del procesu de blanquiamientu de les fuercies armaes y policiales, tán xeneralizándose cada vez más les actividaes escolares venceyaes a les denominaes fuercies de seguridá del Estáu
Estes iniciatives, entamaes baxo la apariencia d’educación cívica o conocencia social, valen en realidá pa normalizar la presencia de la policía y l’exércitu y pa transmitir a los neños una imaxe dócil y prestosa del aparatu represivu.
La cabera d’estes actividaes tuvo llugar esti martes nes dependencies de la Policía Nacional de Buenavista (Uviéu), onde un grupu de neños de namás cinco años del Colexu Públicu La Ería percorrió les instalaciones. Los rapacinos subieron a motos y furgones, fixéronse semeyes, vieron demostraciones con drones y xugaron colos perros del cuerpu. Un programa pensáu, ensin dulda, pa prestar a la reciella y que salgan con una sensación d’admiración escontra los axentes de la llei.
Pero lo que se-yos presenta como un xuegu o una actividá pedagóxica ye, en fondu, una ferramienta de construcción simbólica, un mecanismu de aceptación temprana de la obediencia ya’l control social. Porque esos mesmos uniformes que güei los faen sorrir, van ser —si les coses nun cambien— los que los repriman cuando reclamen drechos, los que los detengan si practiquen sindicalismu o los que-yos bloquien el pasu cuando quieran oponese a los abusos del poder, torgándo-yos manifestase, por casu, contra la monarquía española o contra l’asesinatu masivu de rapacinos comu ellos.
Nel mesmu país onde se criminaliza la protesta y s’encubre la violencia institucional, estos actos de “proximidá policial” valen d’ensayu emocional pa perpetuar la sumisión social, presentándose la represión camuflada d’educación.
Nel Dos Santos
This work is licensed under a Creative Commons Attribution 4.0 International License.
