Recoyemos les sentíes pallabres d’una cabraliega ante l’actuación del Principado nel “saneamientu” de les ganaderies “si quieren lluchar, yo voi ser la primera n’ir onde faiga falta”
¿Sabéis lo que hai nesi camión? Vaques… Vaques sanes que van pal mataderu. Tán siendo unos díes mui duros en Cabrales. En menos de quince díes, más de doscientes vaques “enfermes”, según ellos, fueron al mataderu. Y toos sabemos que equí nun hai nenguna enfermedá; si la hubiese, a estas hores n’Europa taríemos toos tuberculosos. Hai tantes llagunes nesti tema que mete miéu: nin ellos mesmos saben qué ye fiable y qué non. Si una sale dubiosa, mátenles a todes.
Dieciséis años dempués d’entamar una llucha contra’l malditu saneamientu, seguimos igual o peor. Porque dempués de toos esos años, nin el Principáu, nin el Gobiernu Central, nin la Xunión Europea fixeron absolutamente nada polos ganaderos y queseros de Cabrales (nin polos del restu, pero a mí tócame falar de lo mío).
¿Por qué naide buscó onde ta’l problema? ¿Por qué naide buscó una solución? ¿Vacunes, tal vez? Esta mañana’l pueblu de Tielve, queseru por excelencia, quedó ensin vaques llecheres. Lo mesmo Inguanzo, y vendrán más. Esto nun acaba equí.
Pero hai que callar, dobleganos, baxar la cabeza por miéu a represalies, al qué dirán, a la mala imaxe… Bla, bla, bla. Eso ye lo que quierin: que sigamos con miéu y callaos. Pero creo que toos sabemos lo que hai, y ta a la vista que callase nun ye la solución.
Les vaques nun yeren mies, pero la rabia, la indignación y el dolor que sentí al veles ellí metíes nun puedo nin imaxinar lo que sentiríen los sos dueños. Xente mozo y non tan mozo que llevó la vida entera cuidando y dándo-y la vida a esos animales. Ye horrible.
Dalgunos van zarrar del tou, y otros tendrán que volver a empezar. Y dende llueu que va ser duru, y non falo solo d’económico: falo del alma del ganaderu. Porque sí, tenemos corazón, nun somos máquines. Sentimos y sufrimos por esos animales.
Primero sobraron les cabres y les oveyes, y agora van les vaques. Asina que cuando queráis vender Asturies col quesu Cabrales y nun haya, remembrar que fuísteis vosotros los que acabástis con él. Y non, la solución nun ta en traer lleche de fuera. Nós queremos xente mozo, ganaderos y queseros nes nueses aldees de Cabrales. Queremos siguir viviendo de la nuesa tierra.
El quesu más caru del mundu, el más famosu d’Asturies, el quesu con más historia, que sigue curiándose nes mesmes cueves dende fai cinco mil años, tien los díes contáos. Y too gracies a protocolos ensin cabeza nin sentíu, y a la indiferencia de quien tien el poder pa facer y nun fai.
Siento nun callame, pero nun puedo. Esto ye una inxusticia. Que seis queseríes y cuatro ganaderíes, compañeros toos, tengan que zarrar, duel.
Solo puedo dicirvos que ánimu, y que si quieren lluchar, yo voi ser la primera n’ir onde faiga falta.
Estas pallabres escríboles como Jessica López, quesera.
This work is licensed under a Creative Commons Attribution 4.0 International License.
