La organización nacionaliega Andecha Astur calificó como una agresión más contra la llingua del pueblu asturianu la esclusión de la Filoloxía Asturiana del borrador del nuevu Real Decretu Universitariu que ta preparando’l Ministeriu de Ciencia, Innovación y Universidaes
Nel documentu, que define les especialidaes académices de les futures titulaciones, reconózense les filoloxíes Española, Catalana, Gallega y Vasca, pero nun se fai mención nenguna a la Asturiana, nin se contempla la “Llingua y Lliteratura Asturiana” como campu d’estudiu propiu.
Dende la organización recuerden que nun ye la primer vegada que’l Estáu español ignora l’existencia d’una filoloxía asturiana y, con ello, el drechu de la llingua a ser tratada con igual reconocencia que les demás llingües del Estáu. “Repítese’l mesmu despreciu institucional que llevamos años denunciando”, señalen dende Andecha Astur. “El nuesu idioma sigue tratándose como una curiosidá folclórica, non como una llingua viva, con historia, con producción lliteraria y con una comunidá falante que reclama la so dignidá.”
El borrador del nuevu decretu elimina les vieyes árees de conocimientu pa sustituyiles por especialidaes, y nesti nuevu marcu, l’asturianu quedaría dilíu baxo epígrafes xeneriques como Llingües Modernes y sos Lliteratures. Esta clasificación, denuncien, desanicia la identidá académica del campu d’estudiu asturianu y perpetúa la marxinación institucional que la llingua sufre dende hai más de cuatro décades.
Dende Andecha Astur consideren especialmente grave’l silenciu del gobiernu d’Adrián Barbón, al que acusen de llendar el so “compromisu col asturianu” a declaraciones vacíes y gestos simbólicos ensin efeutos reales. “En tolos años de gobiernu socialista nun se dio nin un pasu decidíu pa garantizar la oficialidá, nin pa normalizar la presencia del asturianu na enseñanza, nin pa dignificar el so estatus universitariu”, critiquen. “Agora, ante esta nueva agresión del Estáu, el Gobiernu calla y vuelve mirar pa otru llau.”
La organización recuerda que la defensa del asturianu nun pue siguir siendo un asuntu de discursos institucionales o de postureu políticu. Reclama que’l Ministeriu modifique’l borrador del Real Decretu pa incorporar la Filoloxía Asturiana como especialidá con identidá propia, y que’l Gobiernu del Principáu actúe darréu pa esixir formalmente esa inclusión, demostrando con fechos, y non con promeses, la defensa de la nuesa llingua.
Amás, faen un llamamientu a la Universidá d’Uviéu y al so profesoráu pa que se posicionen con firmeza nel campu públicu, defendiendo’l drechu a un estudiu universitariu del idioma asturianu con tola reconocencia y dignidá que-y correspuende. “La oficialidá ye urxente, la dignidá llingüística innegociable y la presencia universitaria indispensable”, resume’l comunicáu.
P’Andecha Astur, lo que ta en xuegu ye muncho más que una cuestión académica: ye la pervivencia d’una llingua, d’una cultura y d’un pueblu que sigue reclamando lo que-y pertenez, el reconocimientu plenu de los sos drechos llingüísticos y culturales. Porque lo que fai falta, conclúin, “nun son concesiones nin homenaxes, sinón fechos concretos que garanticen la igualdá real del asturianu.”
Llucía F. Marqués
This work is licensed under a Creative Commons Attribution 4.0 International License.
