El conceyu ampliará’l so mapa de memoria col colocamientu de piedres de la memoria nuna xornada que recordará a vecinos deportaos a campos nazis, al tiempu que se reivindica la dignidá, la reparación y la enseñanza d’aquéllos años de pavura
El conceyu de Mieres, xunto col Grupu Deportaos Asturies y delles entidades collaboradores, cellebra una nueva xornada d’homenaxe a les víctimes asturianes del facismu nazi. L’actu inclúi la colocación de Stolpersteine, les conocíes “piedres de la memoria”, que van asitiase en distintes parroquies y barrios del conceyu pa recordar a vecinos que vivieron la deportación y la represión.
Les Stolpersteine son pequeños bloques de piedra y llatón incrustaos nel suelu frente a les cases onde vivieron les víctimes. En Mieres, esta va ser la segunda colocación, lo que permite ampliar un mapa de la memoria que va medrando dientro’l cascu urbanu y los pueblos del conceyu.
N’Asturies, el númberu de piedres de la memoria supera les setenta, con un compromisu d’algamar les 188 correspondientes a otres tantes víctimes. Nel casu concretu de Mieres, y tres esti nuevu ciclu, son yá diecinueve les Stolpersteine dedicaes a vecinos deportaos, un esfuerciu que busca dar visibilidá a la represión que careció’l conceyu.
La deportación d’asturianos mientres’l nazismu dexó una fonda cicatriz na historia del país. Documentáronse al menos 193 asturianos deportaos a campos de concentración como Mauthausen, Gusen o Hartheim. D’ellos, 97 foron asesinaos nes instalaciones nazis y namás 41 consiguieron sobrevivir a la lliberación. El so destín, marcáu pol trabayu forzáu, la fame, les enfermedaes y la brutalidá del réxime, convirtióse nun símbolu del sufrimientu colectivu d’una xeneración.
Coles Stolpersteine, el suelu de los nuesos pueblos y ciudaes tresfórmase nuna superficie de memoria viva. Pa la ciudadanía de Mieres y d’Asturies, ca piedra nun ye solo un recordatoriu individual, sinón tamién un avisu colectivu sobre les consecuencies del facismu y los riesgos del escaezu. La iniciativa nun se llinda al reconocimientu históricu, sinón que quier tener un fondu calter pedagóxicu: facer que la memoria de los deportaos forme parte de la vida diaria, especialmente nestos tiempos nos que la ñube’l facismu torna menaciar Europa.
Llucía F. Marqués
This work is licensed under a Creative Commons Attribution 4.0 International License.
