Acusen a los partios na xunta Xeneral de facer un ‘paripé’ votando a favor de la oficialidá al mesmu tiempu qu’apreben midies “discriminatories y marxinalizantes” pa la llingua.

El borrador de mandatu marcu de RTPA, propuestu pola Xunta y pendiente de ratificación sigue tratando al asturianu como idioma secundariu y residual, reservau a momentos sueltos, mayormente de calter informal y repeticiones de programes, ya ensin garantizar l’usu d’un asturianu normativu correchu.

La organización nacionaliega Andecha Astur considera que tolo que nun seya l’usu del asturianu comu llingua vehicular dafechu de la radio y la televisión asturianes ta fuera de llugar y denuncien que la Radiotelevisión del Principáu d’Asturies (RTPA), en manes del Gobiernu asturianu, sigue apostando, comu lleven décades denunciando, pola marxinalización llingüística “al traviés d’una estratexa de folixa y maquillaxe qu’arrequexa l’usu del asturianu a programes sueltos y contenios folclóricos”.

La responsabilidá d’ello, apunten, nun ye solo de la dirección del ente, sinon de la Xunta Xeneral,que vien de votar mayoritariamente a favor de la oficialidá del asturianu pero que, sicasí, redacta un mandatu marcu  pal serviciu públicu de radio televisión que consideren risible no que cinca a contenios llingüísticos. Ello dexa n’evidencia, p’Andecha Astur, el so desenfotu pola normalización real y efeutiva del asturianu.

“Medios n’español hai ya abondos y lo qu’Asturies necesita ye una televisión pública de calidá n’asturianu dafechu qu’apueste ensin reserves polo asturiano”.

Per otru llau apunten qu’esti borrador incurre n’illegalidá, al incumplir la Llei d’Usu, que recueye nel so artículu 13 que ‘nes emisiones de radio y televisión y nos demás medios de comunicación con presencia actual o futura de la Administración autonómica, ésta velará por una presencia adecuada del asturianu’.

Por tou ello desixen que l’asturianu seya la llingua vehicular na RTPA, en tolos formatos, horarios y conteníos, garantizándose l’usu d’un asturianu de calidá, evitándose l’amiestáu ya’l consiguiente fomentu de la disglosia y dotándose pa ello de recursos humanos y técnicos específicos pa la producción y emisión en llingua asturiana.

Esti documentu ye un borrador, pendiente d’aprebal pel Plenu y que poro entá ye susceptible d’aplicar estes modificaciones anantes de que se blinde la discriminación por otros nueve años.

Llucía F. Marqués

This work is licensed under a Creative Commons Attribution 4.0 International License.