Iniciativa pol Asturianu denuncia que “la cuestión llingüística queda nun papel secundariu dafechu qu’afíta que’l serviciu públicu audiovisual autonómicu ye en castellanu”
La comisión del mandatu marcu de RTPA vien d’unviar el borrador pa la so votación nel Plenu, un documentu que recueye les obligaciones, cadarma y oxetivos de programación del serviciu públicu pa los próximos años. Seique la normalización del asturianu apaez de pasada nesti borrador, nun se recueye la pidición popular de reconocelu comu llingua vehicular na programación, calteniendo el so sistema d’arrequexamientu de la so presencia en programes sueltos ya ensin afitar la seriedá llingüística nel usu del asturianu. Angüañu la programación n’asturianu ye mínima, con repeticiones costantes ya ensin malpenes conteníos nuevos -nel casu l’eonaviego ye directamente inesistente- y paez qu’asina va seguir.
Hai que remembrar que tovía esti mes la mesma Xunta qu’arrequexa l’asturianu nesti borrador votó mayoritariamente a favor de la oficialidá; tamién que la Llei d’Usu ampara l’apueste pol idioma nos medios públicos, recoyendo nel so artículu 13 que «nes emisiones de radio y televisión y nos demás medios de comunicación con presencia actual o futura de la Administración autonómica, ésta velará por una presencia adecuada del asturianu».
Iniciativa pol Asturianu unvió ya un comunicáu nel que califica de decepcionante esta propuesta d’articuláu, llamentando que “la cuestión llingüística quede nun papel totalmente secundariu qu’afíta que’l serviciu públicu audiovisual autonómicu ye en castellanu”, remembrando que yá fizo llegar les sos propuestes a los grupos parlamentarios de la Xunta Xeneral nel mes de payares, coincidiendo cola celebración del Día Mundial de la Televisión. Ente los plantegamientos de la entidá inclúinse la de convertir la Radio del Principáu d’Asturies (RPA) nuna emisora 100% n’asturianu, incentivar la publicidá nes llingües propies y la emisión d’informativos diarios n’asturianu cola mesma duración que los que s’emiten en castellán, con especial atención na programación dirixía a la reciella, “pa dar sentíu a los medios públicos como motor pa la tresmisión xeneracional”.
Susana Sela
This work is licensed under a Creative Commons Attribution 4.0 International License.
