Andecha Astur tornó a cellebrar l’aniversariu de la Declaración de Soberanía de la Xunta Suprema con un homenaxe delantre la Sala Capitular onde foi roblada
Na intervención, a cargu de Llucía Fernández, destacóse la relevancia hestórica d’esti fechu, la primer declaración d’independencia d’Asturies nesta dómina y la primer declaración de soberanía popular d’Asturies, la segunda d’Europa depués de la Revolución Francesa. La idega de soberanía, precisamente, centró la cellebración, llevantándose ente los presentes les lletres que formen la pallabra “SOBERANÍA”, depués de posar nuna bandera la ufrienda floral.
“Soberanía quier dicir decidir les nueses vides; ser soberanos implica que los vecinos de Peñamayor seya los que tienen la cabera palabra sobre si se yos pon o non una mina al pie de casa. Que’n Tapia, si los tapiegos nun quieren, nun hai mina d’oru. Que nos venti conceyos nos que se tan tramitando 170 llaceriosos parques de bateries haiga qu’escuchar lo que la xente opina. Significa que’l Pueblu Asturianu seya dueñu del so presente ya’l so futuru” recalcó Llucía, amestando que too eso nun presta a “un gobiernu títere especializáu en seguir instrucciones dende Madrid y sacar semeyes con declaraciones populistes”.
Falando del gobiernu y de Barbón, tamién mencionó la folclorización d’esti díi cola invención del “Día de la bandera”, restando tou conteníu hestóricu y soberanista a los fechos ocurrios en mayu del 1808, reduciéndolos a la anéudota pa remanar con ello “esi sentimientu d’arguyu y d’amor por Asturies que ta perpresente nel pueblu asturianu”
Nel Dos Santos
This work is licensed under a Creative Commons Attribution 4.0 International License.
