Acordies el décimu informe de la Federación d’Asociaciones pola Sanidá Pública, con fecha del 2024, Asturies subió siete puestos nel rankin de territorios cola sanidá más privatizada
La privatización sanitaria ye un gran problema del nuesu sistema sanitariu, porque incrementa los costes, mercantiliza un drechu fundamental de les persones, clave del Estáu del Bientar y lleva apareyao una perda de calidá del sistema públicu, lo que fae que de fechu los ciudadanos reciban atención sanitaria de primera o de segunda en función de la so capacidá adquisitiva, xorreciendo les desigualdaes. Les privatizaciones afondaron de magar les trasferencies sanitaries en 2001 y los socesivos gobiernos que careció Asturies, especialmente el d’Adrián Barbón, empobinaron siempres les sos decisiones a beneficiar el sector priváu frente al públicu. Los retayos ya’l deterioru de la Sanidá Pública son el principal incentivu pal puxu del sector priváu, y poro, una de les estratexes utilizaes pa favorecer la privatización.
La falta de tresparencia informativa ye un de los grandes déficits del nuesu sistema sanitariu, polo que ye abegoso algamar datos concretos de les administraciones sanitaries. Con eses restricciones, dende la FADSP van analizando periódicamente el grau de privatización de los servicios sanitarios. Colos datos disponibles afiten que, si nel 2014 Asturies taba nel puestu 14 de 17 no que cinca a privatización sanitaria, nel 2023 algamaba ya la sétima posición. 13’47 cames hospitalaries de ca cien son privaes, ye privao el 10% de l’atención mélica ya’l 32% de la población acudió al médicu priváu de cabecera nel caberu añu analizáu.
Ta nidio qu’esti xorrecimientu de la melecina privao apareya una mayor desigualdá ya esclusiones, porque namás acceden a ello les persones con más recursos, pero amás, afita esti informe, l’aumentu de la financiación pública haza’l sector priváu produz un aumentu de la mortalidá evitable ya que trae consigo una desfinanciación paralela de los centros de xestión pública (Outsourcing health-care services to the private sector and treatable mortality rates).
Llucía F. Marqués
This work is licensed under a Creative Commons Attribution 4.0 International License.
