El Principáu entama los trámites preliminares d’impactu ambiental p’autorizar 4 parques de bateríes de la Corredoria n’Uviéu, compuestos por un total de 260 contenedores
La Coordinadora Ecoloxista denuncia que los 4 parques alluguense n’una zona non urbanizable, arrodiaos de viviendes; animen a los vecinos de Fitoria, Pontón de Vaqueros y la Corredoria a denunciar tamién, pol impactu que supon a la so calidá de vida al tar a menos de 150 metros de los sos llares y les sos instalaciones esportives.
La escasa distancia ente los contenedores de bateríes y les viviendes trai consigo una fuerte contaminación llectromagnética pa la vecindá y los animales, lo qu’aumenta’l riesgu de leucemia n’adultos, cáncer de mama o celebral.
Amás, dende la Coordinadora sollerten de que los riesgos que suponen esti tipu d’instalaciones en casu de fuga térmica o de quema, con consecuencies irreversibles de suma gravedá pa los collindantes, tanto pal mediuambiente como pa la salú humana, polo que ye inadmitible la so instalación próxima a núcleos de población, llugares d’interés medioambiental o zones protexíes.
El Principáu reconoz qu’hai 170 proyectos presentaos, pero solo s’asoleyaron fasta agora los allugamientos de 75. Mientres anuncia la so regulación pa instalase en zones industriales y alloñáu de les zones rurales, sigue tramitándose el so allugamientu en zones rurales y non urbanizables cercanes a les viviendes.
Los parques de bateríes que pel momento se propunxeron n’Asturies son d’estremaos tamaños, dende los d’un contenedor d’almacenamientu, a instalaciones qu’inclúin hasta 320 contenedores. Agora mesmu conocemos proyectos pa dellos conceyos asturianos como los de Salas, Salime, Siero (4 parques), Llanera (3), Mieres (4), Cangues, Uviéu (11), Avilés (3), Corvera (3), L.lena (3), Colunga, Villaviciosa (4), Soto Ribera, Regueras, Xixón (7), Candamo (3), Gozón (5), Piloña (3), Grao, Carreño (3), Cangas, Llangréu, Ribedeva, Ribeseya. Na so mayoría, allugaríense sobro suelu agrícola, alteriando la coherencia visual de la redolada.
Susana Sela
This work is licensed under a Creative Commons Attribution 4.0 International License.
