Parte metereolóxicu

ESTAU DEL TIEMPU Y PREDICIÓN.

@eltiempunasturies.com
Vienres 17 de Payares de 2.017

 

Bonos díes, alborecemos col cielu cubiertu por nubosidá estratificada que fae subir les temperatures mínimes bultablemente, salvándose los valles más averaos a la cordelera onde’l cielu ta poco nuboso o espeyáu, con unes temperatures que ronden los 9ºC, rexistrándose nel puertu Payares 7,3ºC.

Güei pali que pali dirá rompiéndose la nubosidá estratificada pa dir abriendose dellos claros a lu llargu’l díi, pa volver surdir de nuevu ente borrinos y nublines al escurecer. Les temperatures másimes descenderán llixeramente, mientres les mínimes ascienden por mor del cielu cubiertu. L’aire tenderá a rolar al este y coyer dalgo de fueye nel próximu riscar.

Mañana sábadu dempues d’una nueche col cielu cubiertu por nubosidá baxa, dirá pali que pali disipándose, dandu pasu a un día poco ñuble y soleyeru, anque al escurecer volverán a surdir de nuevu borrinos y nublines pel llitoral y cuenca central asturiana pero de manera más ocasional y dispersa. Les temperatures camudarán poco y l’aire sedrá del este con dalguna racha moderada en zones altes y espuestes.

El domingu sedrá un dii mui asemeyau, con dalgo de nubosidá de retención nel entornu de los cordales, emburriada pol vientu del este que pue soplar moderadamente nes zones altes y con unes temperatures que camudarán poco, tando ente los 8ºC de mínima y los 15ºC de másima, polo xeneral, na mayor parte d’Asturies.

Na próxima selmana tendremos un ascensu de les temperatures con másimes que superarán los 18ºC, mientres que les mínimes malpenes baxarán de los 10ºC, amás de magar el miércoles podemos tener fuerte vientu del sur-suroeste, sobre too en zones de montaña, que nos traería l’efectu foehn sobre la cordelera, con temperatures anormálmente altes, pero esto ya lo diremos viendo.