La encuesta entamada dende InfoAsturies al traviés de Twitter y Facebook espeya’l pocu enfotu que los asturianos tienen nel nuevu gobiernu d’España

La encuesta, desendolcada a lo llargo de seyes díes nos que se pudo votar y retrucar a la entruga “¿Cree que’l nueu gobiernu español va suponer daqué meyora p’Asturies?” finó ayeri al meudíi con unos resultaos de 89% NON y namás un 11% SI.

Y ye que según estos datos, los asturianos nun ven que’l cambeu de Mariano por Pedro, siempres moviéndose dientro de los mesmos partíos españoles de siempres, vaiga suponer dala meyora no que cinca a Asturies. De fechu, el comentariu más recoyíu nes redes a lo llargo d’esta encuesta foi “Más de lo mesmo” o “Por Asturies nun va mirar dengún”.

De forma significativo les encuestes “oficiales” rializaes n’Asturies escaecen sistemáticamente entrugues respeutu a la identidá asturiana y la percepción que los asturianos tienen de la situación política propia, de les rellaciones col reinu d’España, del “Principado” y l’estatutu impuestu o de les aspiraciones polítiques colleutives, probatiblemente porque nes esistentes venía espeyándose una fonda identidá asturiana, un marcáu desafeutu a la idega d’España y una concenxa bien nidia de que’l reinu d’España ta fundiendo Asturies.

Los resultaos d’esta encuesta, a la que seguirán otres, dexen n’evidencia esi sentimientu colleutivu, llóxicamente mayor ente los llectores d’Infoasturies, y definen la esistencia d’una Asturies y un Pueblu Asturianu al que se quier tapecer.

Redaición InfoAsturies

This work is licensed under a Creative Commons Attribution 4.0 International License.