La nueva Ministra d’Enerxía española declara nos sos tuits que ta dimpuesta a sacrificar les cuenques mineres en beneficiu d’un “proyeutu español global” nel que los asturianos somos prescindibles
Teresa Ribera, a piques de ser nomada Ministra de Transición Enerxética -qu’englobará les estayes d’Enerxía, Agua, Mediu Ambiente y Cambiu Climáticu- nel gobiernu español de Pedro Sanchez, declárase abiertamente a la contra de la utilización ya explotación del carbón, defendiendo el preslle de les térmiques y posicionándose radicalmente a la contra de la delegación asturiana del so propiu partíu.
Proveniente del anterior gobiernu pesoista, con Jose Luis Fernández Zapatero, Teresa Riberaes ye una encerriscada defensora del cambiu a enerxíes renovables y de la descarbonización, non pali que pali, sinón darréu, enfoque que choca colos plantegamientos del Executivu socialista asturianu defendios pol secretariu xeneral de la FSA, Adrián Barbón.
Ta decidía a ello, pesi a tener bien claro les consecuencies económiques y sociales qu’esa decisión tendría pa Asturies, daqué qu’argumenta esponiendo ensin disimulu la que foi desde siempres la másima del PSOE pa col nuesu país, ello ye, la priorización d’España perriba de tolo asturiano. De confirmase’l so cargu, anuncia, ta dimpuesta a sacrificar les cuenques “Ensin que les cuestiones llocales perxudiquen el proyeutu de tou un país”.
Nuria Prendes
This work is licensed under a Creative Commons Attribution 4.0 International License.
