El Xulgáu contenciosu Alministrativu Númberu 3 d’Uviéu ya almitió a tramite esti pleitu nel que denuncien que’l conceyu prorrogó illegalmente a Black Dragon antigües llicencies d’Astur Gold

La Plataforma ORO NON acaba de presentar demanda xudicial nos Xulgaos Contenciosu-Alministrativos d’Uviéu contra’l Conceyu de Tapia de Casariego por causa de los antiguos sondeos reaniciaos pola compañía minera Black Dragon Gold (antigua Ástur Gold).

ORU NON señala que’l Conceyu prorrogó indebidamente la llicencia d’obres del Proyeutu de la campaña de “sondeos de zarru de malla”. N’alvirtiendo de lo anterior al Conceyu de Tapia de Casariego y ensin llograr una respuesta satisfactoria, ORU NON vióse na obligación d’impugnar el resolvimientu del Conceyal d’Urbanismu del Conceyu de Tapia de Casariego de 28 d’avientu de 2017
pola que se prorrogó tal llicencia.

Esta llicencia prorrogóse “cuatro años dempués de que s’abandonaren les obres por decisión unillateral d’ÁSTUR GOLD” coincidiendo cuando nestos momentos “la mercantil promotora pasó a ser xestionada por nuevos accionistes”.

Sicasí, “si la nueva mercantil quier executar los sondeos tien de pidir una nueva autorización municipal conforme a la normativa aplicable ya que l’antigua caducó y ta reconocio que nun hubo nenguna paralización nin motivu de fuerza mayor qu’evitara la execución de los sondeos”.

El Xulgáu contenciosu alministrativu Númberu 3 d’Uviéu ya almitió y tramita esti pleitu, reclamando d’espediente al alcalde de Tapia.
L’Asociación ORO NON alvierte de que sigue vixilante y activa y reafítase na so intención d’exercer toles acciones xudiciales para torgar que los proyectos mineros en Tapia de Casariego se lleven a cabu.

Redaición InfoAsturies

This work is licensed under a Creative Commons Attribution 4.0 International License.