Los asturianos amosaron la so refuga a les más de 60 muertes y cerca de 3.000 feríos nos recientes ataques israelíes al pueblu palestín

El bombardéu, que coincidió col 70 cabudañu del entamu de la Nakba, foi condergáu por abondes organizaciones, partíos y sindicatos asturianos, que s’aconceyaron ayeri n’Uviéu pa desixir la fin del procesu d’acosu al pueblu palestín.

La Nakba o destierru palestín ye un procesu continúu que dende 1.948 yos ñega sistemáticamente el drechu a vivir nes sos tierres, ya’l drechu a la so identidá nacional y política.

La concentración tuvo’l so momentu más emotivu cola interpretación de “El canto de los páxaros”, de Pau Casals, pol profesor SanMiguel, quien dedicó la pieza musical a los ocho neños achuquinaos -el menor d’ellos d’ocho meses- y los 203 menores feríos nel ataque, nel que tamién foron alcanzaos once periodistes.

Llucía F. Marqués

This work is licensed under a Creative Commons Attribution 4.0 International License.