Les tres cabezaleres ciodaes asturianes van afayase nel Salón Aragonés de Turismu, Aratur, como parte de la promoción en comuña que desendolquen pa potenciar los destinos urbanos d’Asturies 

Asturies tendrá’l so propiu espaciu nel prósimu Salón Aragonés de Turismu, Aratur 2018, que se cellebra la fin de selmana viniente, del 11 al 13 de mayu, nel Palaciu de Congresos de Zaragoza. Esta aición deseldólcase con motivu del alcuerdu de promoción en comuña so la marca ‘Ciudaes d’Asturies’.

Los visitantes de la feria aragonesa van conocer la ufierta turística más urbana d’Asturies, que combina ente les sos atraiciones hestoria, cultura, gastronomía, comerciu y una montonera d’esperiencies.

Daráse información sobro la ufierta d’hoteles nes ciudaes, la ufierta d’escapaes que combinen agospiu y actividaes de turismu activu y gastronomía y el calendariu festivu y cultural de tol añu. Nel estand podrá facese un percorríu per Uviéu, Xixón y Avilés. Tamién va entamase una presentación p’axencies de viaxe y turoperadores.

Redaición InfoAsturies

This work is licensed under a Creative Commons Attribution 4.0 International License.