Les poblaciones de salmones y truches acusen les décades de pesca y de contaminación de los calces, alcontrándose en munches cuenques en pelligru de desapaición
Lo que se pon enriba la mesa nun ye la desapaición de la pesca esportiva nos ríos asturianos, sinon la racionalización del usu de los recursos piscícoles col envís d’asegurar la pervivencia de les especies más emblemátiques de los nuesos ríos.
Nesi sen, hai una riestra de midíes coles que sedría posible amenorgar l’impautu que tienen los pescadores nestes especies al mesmu tiempu que se caltendría l’actividá de la pesca y se garantizaría la presencia d’exemplares nos ríos a llargu plazu.
Les principales propuestes son potenciar la pesca ensin muerte, l’amenorgamientu a cuatro del númberu de truches por pescaor y díe, aumentar la talla mínima de les truches pescables a los 21 cm. pa que queden más truches reproductores y llendar l’horariu de pesca de mena que nun se pueda nel atapecer nin el riscar, torgando l’usu de lluces artificiales
Otra cuestión a tener en cuenta ye l’impautu de les repoblaciones, feches al debalu ya ensin control científicu, que ponen en pelligru a les especies autóctones y a la biodiversidá de los nuesos ríos. En llugar d’eso proponen la creación de zones vedaes dafechu nos puntos de desgüeve, pa permitir la repoblación natural.
Sicasí, la normativa – ya seya la vixente o la que se propón- ta lloñe de ser estrictamente aplicada, por mor de que los insuficientes efeutivos de la guardería fluvial del “Principado” ya’l SEPRONA nun garanticen la correcha vixilancia de los ríos.
Redaición InfoASturies
This work is licensed under a Creative Commons Attribution 4.0 International License.