• Portada
  • >
  • Ensi​n categoría
  • >
  • Entrevistamos a Nyto Rukeli, un de los miembros del coleutivu de rap“La Insurxencia”, condergaos por “Delitos d’odiu y enaltecimientu del terrorismu”

Entrevistamos a Nyto Rukeli, un de los miembros del coleutivu de rap“La Insurxencia”, condergaos por “Delitos d’odiu y enaltecimientu del terrorismu”

  • 14 Marzu, 2018

Los sos cantares nun tienen perda, con frases como “La represión del 39 nun terminó nunca” “Cuspo al estáu fascista, terroristes son ellos”, “Terrorismu ye que si nun puedes pagar a ti y a los tos fíos llárguente, la represión de quien impunxeron la rojigualda, que por intereses Asturies y Galicia amburen” “Si quies acabar colos fusiles faen falta bales”

– Entama diciéndonos de qué se te acusa esautamente y que pena piden para ti.

Acusáronnos a mi y a otros 11 raperos d’enaltecimientu del terrorismu.
L’Audiencia Nacional pidíanos y yá nos condergó a 2 años y un día de cárcel, polo que al ser más de dos años (anque seyaa namá per un día) significa qu’entá nun teniendo antecedentes vamos tener qu’entrar a prisión.

Esti día, na concentración en Xixón en sofitu a los presos políticos y contra la represión falabes precisamente d’esos dos conceutos, “delitos d’odiu” y “enaltecimientu del terrorismu” ¿crees que ye correcho aplicar esos conceutos a los tos cantares?

Evidentemente nun ye correcho. Como dixi, los delitos d’odiu tán supuestamente pensaos específicamente pa coleutivos desfavorecios, que son les muyeres, los homosesuales, les persones d’otres races, etc.
Na práutica estes lleis aplíquense non pa protexer a los desfavorecios, si non a los poderosos, protexíos yá de por sí.
Nunca vemos xulgaos a los que deseyen tiros a homosexuales, o afalen a la violencia machista, por casu.
Col delitu d’enaltecimientu del terrorismu, hai que entrugar primero qué ye’l terrorismu. Ye infundir el terror ente les mases. Pero, la xente en realidá tien mieu a la miseria, a quedar nel paru, a nun tener futuru. A dir a una manifestación a reivindicar cualquier drechu básicu que nos nieguen, y que la policía  yos ábra la tiesta o que-yos pongan multes impagables.
La xente entós tien mieu polo xeneral a tener una baxa calidá de vida. Non a que yo o otru raperu faigamos un cantar combatiendo cola palabra precisamente a los culpables de toa esta situación tremendamente inxusta.

– ¿Puedes dicinos la lletra de delles d’esos canciones que tanto-yos esmolecen?

Nel mio casu son unos cuantos cantares. Basta buscame por YouTube y escuchar dalgunes: “Terrorista quién”Nin so tierra van callame” o “Balazos llíricos” Pero resumiendo, sobremanera esmolez-yos que llamemos a la organización y a la movilización. Que denunciemos qu’esisten presos políticos dende va décades, qu’hubieron esterminios en prisión como’l de la comunista Isabel Aparicio.
Nel pidimientu fiscal sobremanera veníen recoyíes frases onde falaba de presos políticos, y más concretamente, de los presos políticos del PCE (r)

– ¿Porqué tantu mieu a la palabra?

Porque bien usada puede concenciar al pueblu, y eso al poder nun-y interesa. Y muncho menos a un poder como’l del Estáu español, onde nun hubo depuración na supuesta “transición a la democracia”.

Na actual situación de retayu de llibertaes, ¿Qué ye lo que más t’esmolez?

Lo que más m’esmolez ye que nun haiga una rempuesta a tanto atropellu de llibertaes, eso fai que puedan siguir invirtiendo en represión, por que la xente tenga mieu y equí nun se mueva naide.
Saben que la crisis nun acaba, que la xente va dir quemándose, que yá nun valen les mentires nin los falsos mesíes, el sistema ta tocando fondu. Entós cuando la mentira nun sirve, faen usu de la represión pa caltener la so poder, ye por eso que tamos viendo esta esguilada represiva.
Lo que más mieu me da ye que nun espabilemos a curtiu o mediu plazu, porque nos van a machucar entá más.

¿Y porqué esti especial odiu al rap? Quiero dicir, hai cantares punk, rock o inclusive folk de conteníu bien similar y sicasí paez qu’hai una zuna especial col rap…

Quiciabes ye porque’l rap tien un calter más esplícitu y agresivu qu’otres músiques, puedes dicir munches coses en poco tiempu y supongo que-yos ye más fácil coyer la lletra y tomala como un testu, un discursu, y non como una canción. Por eso creo qu’el rap tien tantu poder.

– El to su nun ye demasiao conocíu, sobremanera comparáu col espardimientu que tuvieron Valtonyc y Pablo Hasel… ¿a qué debe eso?

Nun lo tengo bien claro, pero, creo que ye xuna amiestu de delles coses.
La primera ye que nun somos los primeros raperos condergaos a prisión, y la xente acostumóse polo visto.
La segunda ye que somos 12 raperos condergaos de golpe, y nos medios nun salen nomes. Ensin nomes propios nin cares, la xente nun sabe onde buscar la to música, nun sabe quién son esos 12 raperos.
La tercera ye que’l casu ye tan grave al ser 12 artistes al empar condergaos a entrar, que nun-yos interesa que salgamos enforma nos medios. Salimos un día o dos.

– ¿Tienes pensáo retirate o siguirás colos tos cantares a pesar de les acusaciones?

Nun pienso dame. Voi Siguir cantando na mesma llínea porque yo nun fixi nada malo. Al contrario, si un Estáu tan podre y un tribunal herederu del franquismu como ye l’Audiencia Nacional me méte na cárcel poles mios lletres, quier dicir qu’apunté bien. Qu’esos facistes me quiéran presu dame mas argumentos, más rabia, y última hora, reafítenme.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies