El mapa européu de la corrupción, ellaboráu colos datos del Índiz de calidá de Gobiernu de 2017 desendolcáu pola Universidá de Gotemburgo pa la Xunión Europea, desvela l’impresionante nivel de corrupción que se carez n’ Asturies.
Nesti estudiu comparase, pente otres cuestiones, los datos de corrupción de 30 estaos europeos, los 28 miembros y los dos en víes d’adesión. Namás delles rexones italianes como Lombardía, Calabria o’l Piamonte o les de Bulgaria y Rumanía superen al nuesu país nesti problema.
El costu envaloráu de los casos descubiertos supera yá llargamente los doscientos cuatro millones d’euros, una cifra apolmonante pa un país que nun cunta con fondos pa encarar la situación de probitú de la población nin pa protexer el so padrimoniu cultural ya hestóricu. Casu Ayer, casu Aquagest, casu Riopedre, casu Cuideiru, casu Pokemon, casu Grandas de Salime, casu Marea, El Musel, Llanes… estos son dalgunos de los asuntos con nome propiu que saltaron a la prensa los caberos años. La gran mayoría, so’l mandatu del PSOE; de fechu, tolos mentaos sacante’l Pokemon (PP) ya’l de Aquagest, nel que’l partíu implicáu ye UPSC, una alianza llocal d’esmiembros del PSOE.
Los principales responsables del partíu mientres tou esti tiempu -bien especialmente l’espresidente Vicente Álvarez Areces- entá nun tán siendo investigaos y apocayá anuncióse que la nueva vista del principal xuiciu activu nesti momentu -el casu Villa- va retrasase otru par de meses.

Tou apunta a que siguiremos a la tiesta del ranking unos cuantos años más.

Nuria Prendes

This work is licensed under a Creative Commons Attribution 4.0 International License.